Eqqaassutissat Politikenip nuannarinngilai

Svend Rathsackip qiperugai Christianshavns Torv-imiittut Qeqertarsuup tunuanut nassiunneqartariaqaraluarput, eqqumiitsulianik allaaserinnittartoq qallunaaq taama isumaqarpoq.
Allattoq mlk
juulip 27-at 2010 11:26

Eqqumiitsulianik allaaserinnittartup Lars Hedebo Olsenip Grønlændermonumentet nuannarinngilai.

- Kalaallit qiperukkat kusanaatsut soorlu qaammammit nakkartitat, taama Grønlændermonumentet, qiperukkat pingasoqiusaasut taagorpai: tassa arnat marluk, aappaa pilattoq aappaalu ammassannik qaloortoq kiisalu piniartoq qajaalu.

- Naalagaasuuguma Qeqertarsuup tunuanut nassiutissagaluarpakka. Kalaallit ukiuni aggersuni aqquserniorniarlutik piareersaleruttortut qularinngilara, aqqusernillu kaajallattarissat ilaannut taakku eqqaassutissat inissinneqarsinnaapput, Lars Hedebo Olsen allappoq.

Tamanik aqqusaarneqarsinnaasuni eqqumiitsuliat aasap ingerlanerani Politikenip allaaserisarpai. Allaaserinnittartut nuannarisaminnik nuannarinngisaminnillu marlunnik namminneq toqqaapput.

Qiperukkat Svend Rathsackip 1930-kkunni sanaarai 1938-milu Christianshavn Torv-imiilerput.