Eqqaassutissaq serlersaagaq kia akisussaaffigaa?
Hans Egedep eqqaassutissaanut kusanaatsuliorneq pillugu KNR.gl-mit paasiniaavugut kina aammali kikkut eqqaassutissamut akisussaassuunersut. Namminersorlutik Oqartussat Kultureqarnermut Naalakkersuisoqarfimmit ilisimatinneqarpugut eqqaarsutissaq namminneerlutik akisussaaffiginngikkitsik.
Ilisimatinneqarpugulli kommunimit sulisut eqqaassutissaq maannakkut qalipaataajuarlugu aallartissimagaat, kommunimilu attaveqataasinnaasoq, KNR.gl-mit attavigisinnaangisarput innersuunneqarluni.
KNR.gl-mit paaserusukkaluarparput taama pisoqartillugu, soorlu eqqaassutissat serlersaarneqarpata kusanaatsuliornerluunniit iluarsaanneqarpat kimit akisussaaffigineqarlunilu akilerneqassanersoq.
Nunatsinnut kristimiuussutsimik eqqussisup Nuummillu tunngaviliiusup, Hans Egedep eqqaassutissaa qalipaammik aappalaartumik kiinaatigut eqqaasutissallu ilaa kusaanaatsumik sapaatip akunnerata naanerani kuerarneqarsimavoq.
Eqqaassutissallu toqqaviani aamma 666 allanneqarsimavoq sanningasorlu kussangasoq aamma aappalaartumik titartarneqarsimalluni.
Inuit arlallit kusanaatsuliortuunissaat ilimanaateqarsinnaavoq.
Nuummi politiit pigaartuat, Karl Sværd, KNR.gl-imut ilisimatitsivoq eqqaassutissap kusanaatsuliorfigineqarnera pillugu ullaaq nalunarfigineqarsimallutik.