Eqqaassineq kingusissukkut politiit nalunaarutigaat

Nuup Nuussuaani ullaaq angut tarnimigut napparsimasoq biilit tungaannut eqqaassimmat, politiit kingusissukkut aatsaat avammut nalunaaruteqarsimapput.

- Taama pisoqartillugu tusagassiuutit suleqatigineqarsinnaasarput. Unalu ullaaq pisoq eqqarsaatigalugu inuit qanillivallaannginnissaannik mianersoqqusiniarluta tusagassiuutit atorsimasinnaagaluarpavut. Kisianni aamma illua´tungaatigut avammut tusarliussigaluarutta inunnik ussatitsinermik kinguneqarsinnaavoq, taama oqarpoq Nuummi politimesteri Anders Linnet.

Ullaaq eqqaassineq pillugu nutaarsiassaq radio aviisip piaartumik tusarpaa. Politeeqarfimmullu paasiniaasoqartaraluartoq paasissutissiisoqarumasimanngilaq, Nuussuarmullu aqqutaanut aqqutit tamarmik matoqqammata, aatsaat 3 tiimi missaat qaangiummata radio aviisi paasisaqarsinnaasimavoq.

Anders Linnet aperaarput, inuit suliartukaasorpassuit suliffimminnut inortuisut susoqarneranillu paatsuungasut, paasissutissinniarlugit tusarliussisoqalaarsimasinnaasimannginnersoq.

- Ilumut, suliartukaasut arlallit inortuisimassagaluarput. Kisianni tassa taamaattoqartillugu inuit imminnut eqqarsaatigisariaqarput, angerlarallarlutilluunniit pisariaqarput, Anders Linnet oqarpoq.

Nuummi politeeqarfiup Nuup radioa attaviginiarsimavaa, KNR-imullu attaveqarniarsimanani, sooq taamaattoqarsimanera politimesterip akisinnaannginnerarpaa.

Anders Linnet naggataatigut aperaarput, assingusumik pisoqaqqissagaluarpat, tusagassiuutit qaqugukkut attavigineqassanersut.

- Tamatumunnga tunngasunik malittarisassaqanngilaq, nalilersuinerilli pisariaqassapput, Anders Linnet oqarpoq.

Anders Linnet aamma isumaqarpoq, inunnik ajoqusertoqannginnera politiillu ajunngitsumik angusaqarsimanerat nuannaarutigiinnartariaqartoq.