Eqqaaniaalluni tusarnaartitsinissaq soqutigineqaqaaq

Los Angelesimi Michael Jackson eqqaaniarlugu Staples Centerimi aqagu unnukkut tusarnaartitsinissamut bilitsit 17.500-uusut piumaneqaqaat.
Allattoq Elisa Isaksen
juulip 06-at 2009 07:43

Manna tikillugu Michael Jacksonimik nuannarisallit 9.000-it bilitsissaminnik iluatsitsisimapput, bilitsinillu isertorluni internetikkut tuniniaaneq aallarteriivissimavoq, inissanullu pitsaanernut bilitsit millionit koruunit angullugit akeqartinneqarput.

Eqqaaniaalluni tusarnaartitsinissami qanorpiaq susoqassanersoq suli oqaatigineqanngilaq - taamaattorli erinarsortartut tusaamasaanerpaat tusarnaartitsiumaartut tusatsiakkanut ilaavoq.

Eqqaaniaaneq aqagu marlunngornermi ualikkut Nunatsinni nalunaaqutaq pingasunut aallartissaaq, nunarsuarlu tamakkerlugu tv-kkut toqqaannartumik aallakaatinneqassalluni.

Michael Jackson 50-inik ukioqarluni juunip 25-anni toquvoq.