Eqimi tupersimaartoqarsinnaavoq

Aasaq qanilliartorpoq, taamalu aamma inuit asimukarlutik tupersimaartalernissaannut piffissanngulerluni.

Nunatsinni sumiiffiit alianaannerpaat ilaat tassaavoq Ilulissat eqqaanni Eqimi sermeq uukkaasoq.

Maannalu Qaasuitsup Kommunia paasissutissiivoq kikkulluunniit Eqip eqqaani aallaarsimaarsinnaasut.

Taama paasissutissiineq pivoq, Eqip eqqaani tupersimaarniat itigartitaasimareersullu.

- Itigartitsissuteqarsimaneq kukkunerusoq, Qaasuitsup Kommunia erseqqissaavoq.

Tassami kommunip paasisimammagu Eqip eqqaani aallaarsimaarnissaq inerteqqutaannginnersoq nalornissutigineqalersimammat. Kalaallit Nunaannili kinaluunniit nunamik piginnittussaatitaanngilaq. Tamannalu aamma Eqimut atuulluni.

Qaasuitsup Kommuniata nuna panerpallaaleraanngat innermik maaniinnaq ikumatitsinissaq allatut ajornartumik inerteqqutigisariaqalersinnaasarpaa. Tamannali Eqip eqqaani aallaarsimaarnissap inerteqqutigineqarneranik kinguneqarsimanngisaannarluni, kommuni erseqqissaavoq.

Taavalu pinngortitamut alianaatsumut aallariannguaritsi, Qaasuitsup Kommunia oqarpoq, tamannalu aamma tamatuma eqqaani najugalinnut takornarianullu atuuppoq.

Eqi imaluunniit Ilulissat kangiata sermia UNESCO-p allattorsimaffiani Nunarsuarmi kinguaariit kingornutassaattut eriagisassatut 2004-mi allassimasuulerpoq.