Enzymenik atuinissaq inatsiseqartariaqarpoq
Uumassusillit tappiorannartut, soorlu Qeqertarsuup puilasuini uumasuusut, avammut tunisassiaralugit iluaqutigilissagutsigik, atuisinnaanermut tunngaviusumik inatsiseqartariaqarpoq. Tamanna Inatsisartut ullumi ataatsimiinnerminni oqaluuseraat. Uumassusilinnit isumalluutit niuernermi ilisimatusarnermilu atorneri pillugit inatsisissatut Naalakkersuisut siunnersuutaannut Inatsisartuni partiit illuatungiliuttut Demokraatit Kattusseqatigiillu assigiinngitsunik apeqqusiipput.
Kattusseqatigiit siulittaasuat Inatsisartunilu ilaasortaatitaat Anthon Frederiksen isumaqarpoq siunnersuut kingusinaartoq:
- 1992-imili nunat tamalaat ataatsimoorlutik pigisanik atuisinnaaneq akuersissutigaat, danskillu naalagaaffiata 1993-imi tamanna aamma akuersissutigaa, taamaattumik ukiut 13-it qaangiutereersut inatsisisamik siunnersuuteqartoqarnera isumaqarpunga kingusippallaalaartoq.
Athon Frederiksenip uparuaataanut Inuussutissarsiornermut Naalakkersuisoq Sivert K. Heilmann ima akivoq:
- Saqqummiutanni allassimavoq Naalakkersuisut 2000-imi aalajangerput uumassusilinnik iluaqutigineqarsinnaasunik atuinissamut akuersisoqassanngitsoq inatsimmik tunngavissaqartinnagu. Tassa ersarippoq, susassaqartut assigiinngitsut tusarniarneqarput nalilersueqqissaarnermullu piffissaq sivisooq atorneqartariaqarsimavoq.
Uumassusilinnit isumalluutit niuernermi ilisimatusarnermilu atorneri pillugit inatsisissatut siunnersuut sukumiisumik paasissutissiinngitsoq
Demokraatit isumaqarput. Tunisassiulernissami nunarput qanoq piginneqataassava? Demokraatit aperaat tunisassiulernissamullu aningaasatigut missingersuutinik ujartuillutik. Tamanna Sivert K. Heilmannip ima akivaa:
- Nalunsatsinnik eqqoriaanerit pisinnaanngillat. Kisianni inatsisiliornikkut immaqalu pisinnaatitsinikkut una inatsisissaq akuerineqassariarpat, ilusilersuinerit qanorlu niueqatigiissinnaanerit ilusilersorneqassapput, minnerunngitsumillu suugaluarnersunik iluaqutissagut niuerutigissagutsigit nunani allani misilittagarineqartut qanillattorlugit nalilersuisariaqassaagut. Taamaammat suna tamaat qulaajareerlugu, aatsaallu nunarsuarmi taama inatsiliortoqalersoq, misilittagaqarfiginerusariaqarparput.
Inuussutissarsiornermut Naalakkersuisoq Sivert K. Heilmann taama oqarpoq. Naalakkersuisut siunnersuutigaat siunnersuut aappassaaneerneqartigani Inuussutissarsiornermut Ataatsimiititaliami suliarineqaqqaassasoq, tamatumunngalu Inatsisartuni partiit tamarmiusut tapersersuipput.
