Enoksen unioqqutitsisimanerarneqarpoq

Kukkunersiuinermut ataatsimiititaliap Hans Enoksenip Aalisarnermut naalakkersuisuunerata nalaani pisoq pillugu sakkortuumik uparuaataa, Hans Enoksenip oqaaseqarfigerusunngilluinnarpaa.

Sermitsiami ullumi saqqummersumi allaaserineqarpoq, Aalisarnermut Naalakkersuisuusimasoq, Rasmus Frederiksen, siorna tunuartitaammat taarserlugu Aalisarnermut naalakkersuisuunermi nalaani naalakkersuisutut atorfimminik ingerlatsisimanera kukkunersiuinermik ataatsimiititaliamit sakkortuumik isornartorsiorneqartoq.

Tamanna pillugu kukkunersiuinermi ataatsimiititaliat isumaliutissiissutaat suli atsiorneqanngilaq, inatsisartunilu aappassaaneerneqarnissaa sapaatip-akunnerata tulliani pissalluni. Taamaattumillu tusagassiutit isumaliutissiissut pillugu suli aamma tigusaqarsimanngillat.

Inatsisartut allattoqarfianneersoq, Nikolaj Sørensen, naapertorlugu, isumaliutissiissut ataasinngorpat naammassineqareersimassaaq, isumaliutissiissummilu tassani Hans Enoksen inatsisinik unioqqutitsisimanerarlugu nalunaarutiginnittoqarpoq.

Hans Enoksenip aalisarnermut naalakkersuisuunermi nalaani pisassiissutinik angallammiit angallammut allamut nuutsinissaq akuerisimavaa,

aamma angallat suli pisassinneqanngitsoq aalisarsinnaanngortissimavaa, taamalu iliornerit Aalisarnermut Inatsimmut akerliupput.

Hans Enoksen tamanna pillugu oqaaseqartinniarsimagaluarparput, aallaqqaammut apersorneqarnissi akueraa, kingornali nalunaarpoq ataatsimeeriataarnissi pillugu apersorneqarsinnaanani.

Kukkunersiuinermi ataatsimiititaliami siulittaasoq, Kristian Jerimiassen, aammalu tullersortaa, Otto Jerimiassen, tamanna pillugu oqaaseqarumanngillat. Taakku tupigusuutigaat, qanoq ililluni tamanna avataaniit paasineqariataarsimanersoq, ataatsimiititalianimi ilaasortat isumaliutissiissut atsiorneqartinnagu avammut oqaaseqaqqusaanngimmata.

Otto Jerimiassenip oqarnera naapertorlugu kukkunersiuinermi ataatsimiititaliaq ualeru marlunut ataatsimiissapput.