Enoksen: Tusagassiorfiit piumasaarsorput

Simon Olsenip aningaasaqarnermut ataatsimiititaliami siulittaasunngortinneqarnerata Siumup immikkoortortaqarfiisa ilaasa naliliinerlunnertut isumaqarfigininnerat Siumup siulittaasuata Hans Enoksenip taamaassorinngilaa.

ESU-mi qanga pisimasut inummut ataatsimut tutsinniarneqarnera Hans Enoksenip pissusissamisuunnginnerarpaa.

- Simon Olsenip allatulli piginnaatitaaffeqarnera qassiiliuutaasariaqanngilaq, qanga pisarsimasut siumukkormiut ilaannit partiinillu allanit inummut ataatsimut tutsinniarneqarnerat pissusissamisuunngilaq.

- Tusatsiakkat aallaavigalugit oqallittarnerit amerlavallaaqaat, neriuppungalu toqqaannartumik uagutsinnut attaveqartassasut, tusagassiorfiimmi aaqqisinnaanngillat, uagununa siumumi nammineq aaqqissagipput.

Siumup siulittaasua Hans Enoksen oqarpoq.

Siulersuisuunerit immikkoortortaqarfinnut nassuiaammik allagaqalersaarput, nassuiatigineqassallutik ESU-mut tunngasut ersarissakkat. Hans Enokseni isumaqarpoq tusagassiortut partiillu illua-tungiliuttullu oqartitsiniarnerat oqallinnermut aallaaviuvallaartut, taamaammat siumup allattoqarfianut immikkoortortaqarfiit saaffiginninnerusariaqartut.

Siumup immikkoortortaqarfia Nanortalimmiittoq tusagassiorfinnut nalunaaruteqarluni allappoq siulersuisuuneranut allagaqaatigigitsik Simon Olsenip aningaasaqarnermut ataatsimiititaliami siulittaasunngortinneqarnerani pisut akuerisinnaanagit.