Enoksen: Taasinissaq pipallataanngilaq

- Inatsisartut ataatsimiinneranni namminersornermut taasinissaq, aap naaggalu periarfissaassasut aalajangerneqarpoq, Naalakkersuisut siulittaasuat Hans Enoksen taama oqarpoq.

Aperaarput sooq innuttaasut namminersorneq pillugu taasisitsinissami `kinguartitsineq` periarfissarinianngikkaat.

- Isumaqarpunga suliat annertuumik ingerlanneqareersut aamma ippassaani aatsaat suliaq aallartinngilaq, namminersornerulerneq 1979-imili eqqunneqarmalli anersaaq taanna sulissutigineqalerpoq, Hans Enoksen oqarpoq nangillunilu: - Kommissioni kalaallinik ilaasortalik 1999-iminngaanniit 2003-mut ingerlanikuuvoq sinerissami illoqarfiit nunarfiillu angalaffigineqarlutik.

Tassaanngaanniillu suliaq 2004-mit 2008-p tungaanut kommissioni pilersinneqarpoq, tassunga atatillugu qaammarsaanerit ingerlanneqarput. Taamaammat paasisitsiniaaneq ingerlanneqareerpoq, Hans Enoksen taama oqarpoq.

Hans Enoksenittaaq oqaatigaa ilinniartitaaneq aningaasaliiffigineqarluartartoq, taamaammat siunissami inuusuttut ilinniarluarsimasut namminneq oqartussaassuseqarlutik nunaminnik

ingerlatsilerumaartut qularutiginngikkini.

Hans Enoksen naggasiullugu ima oqarpoq:

- Taasisitsineq kommissionip suliakkiissutaa aallaavigalugu ingerlanneqassaaq, namminersorneq eqqunneqassanersoq imaluunniit naaggaarneqassanersoq. Isumaqarpunga taanna ersarissumik inuiannut paasiniaanerusoq.