Enoksen Qaanaarmiunut: Ajornartorsiutit nammineq iluarsiniarsigik

Naalakkersuisut siulittaasuat Hans Enoksen naalakkersuisunullu ilaasortat Aqqalu Abelsen aamma Aleqa Hammond Qaanaamut ullumi tikipput. Qaanaarmiut sivisuumik utaqqisimasatik nipilioqalutik akerliussutsimik takutitsiffigaat, taamaattorli Hans Enoksen oqalugiarluni aallartimmat nipikillinerupput.

Akerliussutsimik takutitsisut ilaatigut ima nilliapput:

- Pitsaanerusumik, akisussaanerusumik, nunarput aqutsisoqartariaqalerpoq, qulaaniit nikanarsarnagit! Taamaalereermat katersuussimasut nillerrapput.

Hans Enoksen ilaatigut ima oqarpoq:

- Tikilluaqqusinissinnut siullermik qujavunga aamma isummassinnik nittarsaassinissinnut, tammatami isummersorsinnaatitaavugut. Imaanngilaq nunap sinnerani minnerusutut isigineqartusi. Annertoorujussuarmik tapersersorneqarpusu, aamma naalakkersuinikkut. Nalunngilarput Qaanaami pissutsit ulluni makkunani qanoq ilungersunartigisut. Sunaana akerleriissutigigipput, ajornartorsiut Qaanaamiinnaanngitsoq ajornartorsiutaappat? Nerrivimmut eqqissilluta ingilluta oqaloqatigiitta, taava ajornartorsiutit minnerulernissaat suleqatigiissutigissavarput. Imigassaq matoqqassasoq uanga aalajangiusimalluinnaqqissaarpara. Inuit tamarmik eqqarsalersittariqarput - Qaanaamiinnanngitsoq, pisortat kisiisa isumalluutigiinnarlugit inuuneq ingerlaqqissinnaajunnaarpoq, takuara maani qanoq sapinngippasitsigisusi piumassuseqartigisusilu. Taava taanna ilissi sapinngikkussi aaqqinniarniarsiuk,avataaniittut kisiisa isumalluutiginagit. Hans Enoksenikkut kisimik pisuutinneqarsinnaanngillat, ilissi annertoorujussuarmik aamma akisussaaqataavusi, Hans Enoksen Qaanaami oqalugiarnermini ilaatigut taama oqarpoq.

Naalakkersuisunut ilaasortat ullut sisamat Qaanaamiissapput, taavaniinnerminnilu nunaqarfiit ilaasa tikeraarnissaat pilersaarutigaat.