Enoksen: Nunat allamiut nunassinnissaannut oqartussaaffik akisussaaffigisariaqarparput
Dansk Folkepartiip nunanut allanut tunngassuteqartunik oqaaseqartartuata Søren Espersenip Hans Enoksenip taamatut oqarnera akuerisinnaannginnerarpaa.
- Kalaallit Nunaata killeqarfiani nunamut iserniarlutik angalasunik misissuisoqartalernissaa eqqunneqartariaqarsoraara. Inuit Kalaallit Nunaanni najugaqartut danskisut inuttaassuseqarput, danskisulli passeqarlutik. Aappariit Danmarkimut nunassinniartut aapparisaa Danmarkimut iserniaruni Nuummi akuersissummik qinnuteqartariaqassava? Søren Espersen aperivoq, tamannalu kimilluunniit akuerineqarsinnaanngitsoq oqarluni.
Socialdemokratit oqaaseqartartuat Henrik Dam Kristensen isumaqarpoq, allamiut nunassinnissaannut oqartussaaffimmik Kalaallit Nunaata piumasaqalernera pissusissamisuuginnartoq, killeqarfinnillu periutsit assigalugit misissuisalernissamik Dansk Folkepartiip oqalunnera paasisinnaanagu, Henrik Dam Kristensen aviisimut Polikenimut oqarpoq.
Nunat allamiut nunassinnissaannut oqartussaaffiup nunatsinnit akisussaaffigineqalernissaanik Naalakkersuisut siulittaasuata Hans Enoksenip piumasaqarnera timmisartortitseqatigiiffiup Air Greenlandip pisortaanerata Michael Binzerip tapersersoraa, aviisi politiken allappoq.
- Air Greenlandimi timmisartortartunik mekanikerinillu Europap avataaneersunik sulisussarsiortarneq ajornartorsiutigineqarpoq, taakkua Kalaallit Nunaanni sulilersinnaanissaannut akuersissummik piniartarneq ajornartorsiutaasarmat Michael Binzer oqarpoq.
Taamaattumik nunanut allanut oqartussaaffik Kalaallit Nunaanni oqartussaaffigineqalissappat tamanna silatusaarnerussasoq Michael Binzer isumaqarpoq.
Namminersornerullutik Oqartussat Københavnimi sinniisoqarfiani pisortaq Tove Søvndahl Pedersern oqarpoq, nunassinniarneq sivikinnerusumilluunniit Danmarkimiissinnaanermut akuersissutinik piniarneq ajornakusoortorujussuusinnaasoq.
- Nunat allamiut nunassinniarlutik saaffiginnittarfianni kiffartuussineq eqarpallaarpoq, Tove Søvdahl Pedersen oqarpoq.
