Enoksen: Nunarput akuliunnagu

februaarip 28-at 2005 07:34

Kalaallit Nunaata Savalimmiullu nunanut allanut politikkimik oqartussaaqaataanerulernissaat pillugu inatsit utaqqisilaaqqullugu Savalimmiuni naalakkersuisut siulittaasuat, Joannes Eidesgaard, ministeriunermut Anders Fogh Rasmussenimut naalakkersuisullu siulittaasuannut Hans Enoksenimut allagaqarpoq.

Naalakkersuisut siulittaasuata Hans Enoksenip uppernarsarpaa allagaq tigusimallugu, Joannes Eidesgaardillu naammagittaalliutaanut akilluni oqarpoq nunatsinni inatsisartut nunanut allanut oqartussaanerunissamut ukiarmi inassutaat malillugu sulineq ingerlaannassasoq.

Savalimmiut danskillu assortuunnerat akuliuffiginianngilaa. Hans Enoksen maanna Upernavimmiittoq radioaviisimut oqarpoq.

Joannes Eidesgaardip allakkamini nunatta oqartussaanerulernissaanut inatsisissamut folketingimi siunnersuutigineqarsimasup akuersissutigineqarnissaa utaqqimaaqquaa, siunnersuulli Folketingimi saqqummiunneqareerpoq.

Inatsisissami Kalaallit Nunaat nammineerluni nunanut allanut isumaqatigiissusiorsinnaasoq siunnersuutigineqarpoq, inatsisissamili ilanngunneqarluni aatsaat Kalaallit Nunaat Savalimmiullu isumaqatigiissinnaappata.

Savalimmiormiut nunanut allanut politikki pillugu Danskinut isumaqataavallaartanngitsoq ilisimaneqarpoq.

Nunanut allannut oqartussaanerunissaannik tunngavissamik maanna savalimmiormiut suliaqarput.