Enoksen naakkigeqqusaartutut uparuarneqarpoq

Siumup sulitaasuata Hans Enoksen-ip nalunaarutaani eqqartorneqartunut ilaavoq akinik assigiikkunnaarsitsisimanerup iluaqutai.

uppiteriarneqartarninilu eqqaammagu, uparuarneqarpoq naakkigeqqusaartutut.

Sisimiuni Siumup ataatsimeersuarnerani siulittaasup Hans Enoksen-ip nalunaarutaata quppernernik 15-nik amerlassusillip aallartinnerani eqqaaneqartunut siullernut ilaavoq, ukioq 2002-mi oktoberip qaammataani siulittaasumik uppisitseriarsimaneq.

Hans Enoksen-i oqalugiarnermini oqarpoq uggornartoq 2001-mi siulittaasumik qinersisimanerup ataqqineqarsimannginnera. Nangillunilu oqarpoq taamatut pissusilersorsimaneq Siumup partiianut tulluanngitsoq.

Siulittaasup oqalugiaataani eqqartorneqartunut aamma ilaavoq akinik assigiikkunnaarsitsisimaneq.

Hans Enoksen isumaqarpoq akinik assigiikkunnaarsitsinissaq Siumup ilaasortanit isumaqatigineqarsimasoq, nangillunilu oqarpoq: - Nammaqatigiittarneq ilaatigut sinnassaatigaarput, ilatta sukkanerusumik ineriartornissaanut noqitsisoraarput.

Lars-Emil Johansen oqalugiaammut uparuaanermini oqarpoq Hans Enoksen-ip oqalugiarnerminni qiimanerusariaqartoq aammalu uppisitseriarsimanermut atatillugu oqalugiarnermini imminut nalligivallaartoq. Lars-Emil Johansen isumaqarpoq imminut nalligisarneq partiip siulittaasuanut tulluanngitsoq. Nangillunilu oqarpoq akinik assigiikkunnaartitsisimaneq Siumup politikkianut tulluanngitsoq, isumaqarami pissakinnerit Siumup partiiata illersortariaqarai, taamaammallu ukioq manna akinik assigiikkunnaartitsisimaneq Siumup politikkianut tulluanngitsoq Lars-Emil Johansen-ip oqaatigaa.

Uummannap kommuneani nunaqarfimmi aqutsisuni aammalu kommunalbestyrelsemi ilaasortaq nunaqarfimmi –Saattuneersoq Apollo Mathiassen oqarpoq akinik assigiikkunnaartitsisimaneq isumaqatigalugu. Apollo Mathiassen-lu isumaqarpoq namminersulivinnissaq anguneqasappat, innuttaasut sumiluunniit najugaqaraluarunik akiviusunik akiliisariaqartut.