Enoksen: Kukkunitta nassuerutiginissaa ersissutigisariaqanngilarput
- Qularnanngilaq taanna annertunaarparput aallaqqaammut, kukkuneq nassuerutigissallugu qunuginngilara, innuttaasut misigisimapput aaqqissuussinermi ilaatigut ilungersunartumik atugassaqartitaassallutik, taannalu soorunami uagut kissaatiginikuunngilarput, akerlianik kissaatiginikuuarput sukkanerusumik akikinnerusumillu sullissinissaq aaqqissuunneqartariaqartoq, Hans Enoksen oqarpoq nangillunilu:
- Oqallittoqarnissaanik kaammattuivunga aamma puigorneqartariaqanngillat, avannaata kommunerujussua eqqarsaatigalugu, Attuminngaanniit Siorapalummut isorartoorujussuuvoq aamma nunaqarfipparujussuit taavalu illoqarfiit avinngarusimasut avannaaniillutik. Taakkua misigisimatinneqartariaqarput aamma puigorneqaratik eqqaamaneqarlutik. Massakkut aqutsineq aallartinniagarput inatsisartut naqissusernikuugaluarpaat, kisianni takusinnaareerparput aningaasarparujussuarnik atuilluni ulluinnarni ingerlatsineq ingerlanneqartariaqassasoq. Taannalu soorunami siunertaanngilaq. Allannguiniarnermi siunertaavoq sapinngisamik aningaasat ikinnerpaat atorlugit ingerlatsinerit aaqissuunneqartariaqartut, taanna anersaaralugu sulineq ingerlassappat taava tassani nalileeqqissaarnissarput, avaqqunneqarsinnaanngilaq, Hans Enoksen taama oqarpoq.
Naalakkersuisut siulittaasuata Hans Enoksenip kommunerujussuit sisamat ikaarsaariarnermut ataatsimiititaliaasa siulittaasui ualeru nalunaaqutaq marlunut ataatsimeeqatigissavai.
Qaasuitsup Kommunissaata angivallaarnerarneqarnera 2013-ip tungaanut nalilersorneqassasoq, Qaasuitsup Kommunissaani ikaarsaariarnermut ataatsimiititaliami siulittaasoq Jess Svane oqarpoq.
- Oqallinneq taamatut allanngortinneqassappat massakkut kommunini arfineq-pingasuusuni atorfilittat suliarparujussui aammalu qinikkat piareersaqataanerat, natermut nakkaasoorneqarsinnaanerat annilaangatingivara, taamaammat una oqallinneq taamatullu isumaliorneq assortornagu uanga kissaatiginerussavara 2013-it tungaanut nalilerluartigu nukissaqarfiginerlugu, Qaasuitsup Kommunissaani ikaarsaariarnermut ataatsimiititaliami siulittaasoq Jess Svane taama oqarpoq.
