Enoksen: Kattussuunnissaq kinguartinneqassanngilaq
Kommunit kattussuunnissaat ukiumik ataatsimik kinguartinneqartariaqarpoq, taama kommuneqarfinni borgmesterit Københavnimi ataatsimeeqatigiissut ataatsimoorussaminnik ullumi oqariartuuteqarput. Taamalu avammut tusarliussineq Naalakkersuisut siulittaasuata Hans Enoksenip suli tigusimannginnnerarpaa, aatsaallu radioavisikkut tusarini oqarpoq. Hans Enoksen oqarpoq:
- Tassa kommunet kattussuunnissaannut pilersaarutit attatiinnarneqarnissaat ippassaani Inatsisartuni tamakkiisumik tunuliaqutaqarluta naammassineqartut isumaqarpunga ingerlatiinnarneqartariaqartut. Aamma suliassat nutaajunngillat, borgmesterit arlalippassuariarlutik aaqqissuussaanermut aamma ataatsimiititaliaq, annertuumik ataatsimeeqatigisarlugu, innuttaasunik tusarniaareerluta, siunnerfik taanna naatsorsuutigaarput januaarip aallaqqaataa 2009 aallaavigalugu atuutsinneqalissasoq.
Hans Enoksen nangilluni erseqqissaavoq:
- Uani piffissaq ajornartorsiutigissappassuk, oqaatigissavara 2009-mi januaarip aallaqqaataani suna tamarmi kommunenut nuunneqarsinnaanngimmat. Kisiannili ikaarsaariartoqassaaq, 2013-ip tungaanut.
Borgmesterinik tassa pinngitsaaliiniarnersut Naalakkersuisut siulittaasuat aperaarput, akivorlu:
- Inatsisartut sulinerat tunngavigalugu borgmesterit kommunellu tamarmik ilisimateqqissaarneqartarput, aamma tamakkiisumik tapersersormassuk, ilaatigullu allaat uagutsinnit tuaviornerullutik innersuussutiginikuuaat, januuarip aallaqqaataa 2009 aallaavigalugu kattunnerit ingerlanneqassasut, uagullu siunnersuutigingaluarparput maajip aallaqqaataa 2009 aallartiffigineqassasoq. Tassa borgmesterit tuaviulernikuupput, ilaatigullu massakkut ilai oqalupput 2009 utaqqisariaqanngikkaluarparpulluunniit, massakkut aallartereersinnaasariaqarpugut- pissutsit aaqqitassat sumiittut tamatta ilisimallualereernikuugatsigit, Hans Enoksen oqarpoq.
Kattussuunnissamut atatillugu ukiuni ikaarsaariarfiusussani aningaasartuutaasussanut atatillugu kommuninik tusarniaasoqarsimannginnera borgmesterinit ippigineqarpoq; tamannalu tusaaniartariaqarsorinnginneraa, Naalakkersuisut siulittaasuat aperaarput, akivorlu:
- Ilumuunngilaq, kattussuunnissaut tunngasut, kommunet kattuffiat peqatigeqqissaarlugu ingerlappavut, aammalu naatsorsuutigaara kommunet kattuffiata soorunami ilaasortani ilisimatittarsimassagai.
