Enoksen: Imigassamik matusineq allanngussanngilaq
- Tassa naatsorsuutiginngilara matusinerup allanngortinneqarnissaa- aalajangiusimalluinnaqqissaarpara matusineq. Tassa ajornartorsiutit annertuut suli ilungersunarnerusinnaasut; meeqqanik sumiginnaaneq, inuusuttut siunissaat isumannaatsumik aaqqinneqassappata, tamatta oqaloqatigiilluta aallartittariaqarpugut. Aamma ajornaqaaq ajornartorsiutit saqqummertullu miserratigiinnarlugit allanik pisuutitsiniaannarluta pisarnerput unitsittariaqalerparput. Massakkut ajornartorsiutit massakkut ima annertutigaat Qaanaamiinaanngitsoq, nunatsinni tamarmi meeqqanik sumiginnaanerpassuit atornerluinerpassuit akueriinnarsinnaajunnaarpavut, taamaammat taanna qitiutillugu, aaqqissuussinissat ingerlanneqarnissaat Naalakkersuisut Siulittaasuattut aalajangiusimalluinnaqqissaarpara.
Qaanaami imigassamik siornagut matusisimanermit misilittakkat aallaavigalugit kommunalbestyrelsimi ilaasortap Niels Qujaukitsup annilaanngatigaa imigassaq ammaqqippat ajornartorsiutit aallaqqaataaniit aallarteqqinnissaat. Tassunga Enoksen akivoq:
- Tunngavilersuuit taakkutakujuaannarpagut. Illoqqortoormiuni ukiualunnguit matuma siornagut taakku tunngavilersuutigerpiarlugit inupparujussuit akerliupput. Kisianni massakkut qanoq pitsaatigisumik alloriarnerit takussutissaqalereerput. Neriuppunga taamatut alloriarneq Qaanaami aamma tikinneqarsinnaassasoq- innuttaasut ajunnginnerusumik inuulerlutik- inuusuttut periarfissaqarnerulerlutik- meeqqat pilluarnerulerlutik. Taannaana uagut angorusukkipput.
Sinerissami illoqarfiit paasineqassangaluarpat imigassamik ajornartorsiorfiusut, taakkunani aamma imigassamik matusisoqarsinnaannsanersoq aperigatsinni, Enoksen akivoq:
- Isumaqarpunga Qaanaarmiut immikkoortinneqanngitsut, aamma sinerissami taamatut atuineq qaffakkiartuinnarpat saneqqunneqarsinnaanngilaq. Kisianni neriuppunga taamaattoqassanngitsoq.
Ruth Heilmann, Siumut sinnerlugu Inatsisartuni ilaasortaaqatiminit Agnethe Davidsenimit atperserneqarluni, naalakkersuisut matusinermut atatillugu nassuiaateqartariaqartut piumasaqarpoq. Hans Enoksen tassunga akivoq:
- Qaanaamukarutta ajornartorsiutit sukumiisumik isertuaatsumik eqqartuiffiginissaat kissaatigivara, aatsaat taamaalippat paaseqatigiilluta suliniutit aqqissussinnaassagatsigit.
