Enoksen Hammondilu Nunavumukalerput

Hans Enoksenip tikeraarnermi Aningaasanut Nunanullu Allanut Naalakkersuisoq Aleqa Hammond ingiallortigissavaa, tamannalu Naalakkersuisut Nunavumik suleqateqarnerminnik pingaartitsinerannut erseqqissaataasoq, Naalakkersuisup allattoqarfianit nalunaarput.

Nunavumi Naalakkersuisut siulittaasuat Paul Okalik ukiut pingasukkaarlugit Kalaallit Nunaanni Nunavumilu Naalakkersuisut siulittaasuisa ataatsimeeqatigiittarnerannut atatillugu qaaqqusisuuvoq.

Ataatsimeeqatigiinnerni assigiinngitsut sammineqassapput, silaannaalli allanngoriartornerata immikkut eqqartorneqangaatsiassaaq.

-Silaannaap allanngoriartornerata sunniutai Nunavumi Kalaallit Nunaannilu innuttaasut annertuumik malugivaat. Taamaattumik inuiaqatigiit Issittumiittut silaannaap allanngoriartornerata sunniutaanik misilittagaat siunissamilu iliuuserisassatut pilersaarutaat paarlaasseqatigiinnikkut annertuumik iluaqutigisinnaavavut.

- Paul Okaliup Kalaallit Nunaanni Silaannaq pillugu Ilisimatusarfissaq soqutigisorujussuuaa, Hans Enoksen oqarpoq.

Silaannaap allanngoriartornerata saniatigut Europamut puisip amiinik eqqusseqqusiunnaarnissamik aarleqquteqarneq eqqartoqatigiissutigineqassaaq.

Akilinermut tikeraarneq Iqalunni pivoq, naatsorsuutigineqarporlu pinngortitamut nunaqarfiup Pangnirtung-p eqqaanut sapaatiuppat takusassarsiortoqassasoq. Okalik, Enoksen Hammondilu qissattaasisassappunngooq!