Enoksen: Ajornartorsiutinut uniinnarata namminersulissaagut
Folketingimi Nunatsinni Namminersulernissap ilusilersorneqarnera pillugu aqagu oqallinnissaq sioqqullugu Hans Enoksenip apersorneqarnera aallakaatinneqarpoq, ilaatigullu aperineqarluni, Nunatsinni inunnik isumaginninnerup iluani ajornartorsiutit taama annertutigisut, qanoq ililluni namminersulivinnissamik eqqartuisinnaanersoq.
Soorunami ajornartorsiutit tamakkua sapinngisarput tamaat aaqqiiffiginiarsaraavut, ajornartorsiutilli aaqqiiffigineqareernissaat utaqqiinnaraluarutsigu qaquguluunniit namminersulernavianngilagut, Hans Enoksen oqarpoq. Uagut ajornartorsiutigisavut sumi tamaani aamma nunani allani ajornartorsiutigineqarput, aamma USA-mi Norgemi Sverigemi Danmarkimilu. Uagut kisitta ajornartorsiutivut tamaasa aaqqiiffigeqqaarlugit aatsaat ingerlariaqqinniartariaqanngilagut. Soorunami sapinngisarput tamaat atorlugu ajornartorsiutivut qaangerniassavagut, katatavullu ikiorsiiffiginiarsaralugit.
Ukiuni 30-ni Namminersornerullutik Oqartussat ingerlatsereersut inunnik isumaginninnerup iluani ajornartorsiutit aaqqiiffigineqarnikuunngitsut, qanoq ililluni immikkut naalagaaffinngornerup kingorna aaqqiiffigineqarsinnaassanersut takorloorneraa, Danmarkip radiuani tusagassiortup, Kirsten Rosingip apeqqutigimmagu, Hans Enoksen akivoq.
Ukiunili kingullerni 30-ni pissutsinik allanguisinnaanerput takutissimavarput. Qaffasittunik ilinniagallit aatsaat taama amerlatigaat, nammineerusulluni aatsaat taama piumassuseqartoqartigaaq. Inuit taamatut misiginerannut pissutaavoq pisariaqartinneqarlutik nalunnginnamikku, nunaminnilu ineriartornermut isiginnaaginnartutut inissisimajunnaarlutik. Namminersornerullutik Oqartussat ullumikkut qiviarutsigik, takusinnaavarput, ukiorpassuarni oqaluuserineqaannarsimasoq maanna angusimagipput, tassa akisussaaffiit kalaallinit tiguneqartariaqarnerat. Periarfissatimmi takulerunikkit ilinniagaqarniassaqqaarput, piginnaasakittut aamma suleqataasariaqarput, inuit aningaasanik tunioraannarneqarsinnaanngillat ilinniagaqarnissaannut kaammattortariaqarpavut, Hans Enoksen oqarpoq.
Nunatsinni Namminersulernissaq pillugu inatsisissatut siunnersuut Folketingimi siullermeerlugu aqagu oqalligisineqassaaq.
