Enok Sandgreen: Nunaqarfimmik sullissilluarusuttut nunaqarfimmiunit qinerneqarput
- Kikkut aqutsisussani ilaasortanngussanersut immaqa nunaqarfimmiunit pissanngatigineqaqimmat, qinersineq soqutiginarluinnarpoq, KANUKOKA-p siulittaasua oqarpoq. Qinersinermi partii imaluunniit inuit ataasiakkaat tunngavigalugit nunaqarfimmiut qinersisimanersut aperigatsinni ima oqarpoq:
- Bygderådinik taaguuteqarallarmata malunnartarpoq, tamanna uanga aamma misigisaqarfiginikuuara, kisianni nunaqarfimmiut nutaamik qinersipput, nunaqarfiit arlariit ataatsimut kattullutik. Inunnut ataasiakkaanut tunnganerunersoq qularilerpara, nunaqarfinnik siunissami sulliserusuttunik qinersisartut qinersisimanissat qularutiginnglara, Enok Sandgreen oqarpoq.
Nunaqarfimmiut qinersisarnerat inatsisartunut qinersinermut tikkuussisarsimanerat taassuma oqaatigaa, qinersiariaallu nutaaq, tassa, nunaqarfiit arlariit kattullutik qinersinerat siunissami aamma atorluarneqarsinnaanissaa Enok Sandgreenip ilimagaa:
- Nunaqarfimmiut ineriartortitsinissaq eqqarsaatigalugu suleqatigiinnerulernissaat matumani ilimagaara, KANUKOKA-p siulittaasua oqarpoq.
KANUKOKA-p siulittaasua Enok Sandgreen, Siumumeersoq, taama oqarpoq.