Enok Sandgreen: IA-p nunaqarfiit sumiginnarpai

Inuit Ataqatigiit siulittaasussaminnik arfininngorpat qinersinissaani siulittaasoq Josef Motzfeldt qinigassanngorteqqippoq. Enok Sandgreen Aasiaat pigisaanni Akunnaami aqutsisut siulittaasuat, immikkoortortaqarfiit arlallit kaammattorpaat Josef Tuusi Motzfeldt siulittaasussatut unammilleqqullugu.

Enok Sandgreenili aalajangertinnani ilaquttani oqaloqatigeqqaarumavai, qinersinissarlu qanillilivippat aatsaat aalajangerniarluni.

Enok Sandgreenili qinigassanngortissaguni sulissutiginiarpaa, immikkoortortaqarfiit kattuffimmut akuunerulernissaat.

- Massakkut immikkoortortaqarfinni sulineq ima ilungersunartigilersimavoq, allaat immikkoortortaqarfiuniartorpassuit unittuuvissimallutik, aallartisarniaraluarlutillu ikiortissaasuasut. Tamakku tikillugit suleqatigineqartariaqarput, Enok Sandgreen oqarpoq.

Nunatta namminersornissaanut suliniarneq aallartereersoq, isumaqarfiginngilaa torrallataasimasoq.

- Akit assigiinnissaannut tunngasoq siulliullugu aallartissimavarput, naak kommunit katitigaanerat siulliuttussaagaluarlutigu. Siulliussimagutsigu akit allanngorneri malunnanngitsumik atulersimassagaluaratsigu, Enok Sandgreen oqarpoq.

Enok Sandgreenip Pituffimmi radarimik nutarterisimaneq apeqquserpaa, aperalunilu nunarput USA-mut tunniutiinnarsimannginnersoq. Nunarsuarmimigooq sorsuttoqalissagaluarpat, nunarput qinngutitut atulersimanera pissutaalluni nunarput sorsunnermi qitiulissagami. Erseqqissaatigaalu inuiaqatigiit tamatuminnga qanoq isumaqarnerinik aperineqarsimanngimmata.