Enhedslistit: Danmark USA-lu oqaloqatigiippat?

februaarip 13-at 2007 16:11

Danmarkimi Enhedslistineersut Nunanut allanut ministeri Per Stig Møller apeqquteqarfiginialerpaat. Danmarkip USA-llu akornanni oqaloqatigiinnernik nutaanik ingerlasoqarsoralugu Folketingip illersornissamut ataatsimiitsitaliaani ilaasortaq Frank Aaen enhedslistemeersoq apeqquteqarniarpoq.

Frank Aaen suliaq pillugu annerusumik oqaaseqarsinnaannginnerarpoq.

- Nunanut allanut ministeriaqarfimmit oqaatigineqarpoq oqaloqatigiittoqanngitsoq, eqqortorli allaalluarsinnaavoq, Frank Aaen oqarpoq.

Nunanut allanut ministeriaqarfik ippassaq nalunaarpoq Danskit Amerikamiullu akornanni Pituffimmi radareqarfiup nutarternissaa pillugu oqaloqatigiinnernik nutaanik ingerlasoqanngitsoq, tassa Igalikumi isumaqatigiissutip 2004-meersup kingorna oqaloqatigeeqqittoqarsimanngitsoq.

-Suliami nutaamik ingerlasoqanngilaq. Danskit aallartitaqarfiat Washingtonimiittoq Pentagonimiit nalunaarfigineqarpoq, Pituffimmut tunngatillugu isumaqatigiissut nutartteriffigineqanngitsoq. Aamma Pituffimmi raadari pillugu oqaloqatigiinnissanik nutaanik Amerikamiut pilersaaruteqanngitsut, Nunanut allanut ministereqarfik nalunaarpoq.

Folketingip illersornissamut ataatsimiitsitaliaani ilaasortaq Per Kaalund Socialdemokratineersoq suliaq pillugu oqaaseqarusunngikkallarpoq, oqarporli USA-p illersornissamut ministeriata oqalugiarnermini kukkuluttorsimasinnaanera aallarterlaajunermik peqquteqarsimasinnaasoq, taamaammallu isumakkeerfigineqarluarsinnaasoq.