Enhedslisti kalaallisut qineqqusaarpoq

- Ilisimavarput kalaallinik amerlasuunik Københavnimi najugaqartoqartoq aammalu isumaqarpugut kalaallit ikinnerussuteqartuusut tusaaneqartariaqartullu Morten Kabell Enhedslistenip Københavnimi immikkoortortaani allatsi, Atuagagdlitinut oqarpoq.

Enhedslistip inunnik isumaginninnermut tunngasunik qineqqusaaruteqarnera partiip kalaallinik attaveqarneruniarneranut pissutaatineqarpoq.

- Nalunngilarput kalaallit amerlasuut Københavnimi najugallit annertuumik ajornartorsiuteqartut. Taakkununngalu ikiuerusunnerput paasitikkumavarput, tassami kalaallit danskisut nalunaarsorneqarnertik pissutigalugu kisitsisitigut paasissutissiisarnerni puigugaasarput, tamanna allanngortikkusupparput, Morten Kabell oqarpoq.

Inuiannik ikinnerussuteqartunik amerlanerusunik attaveqarniarluni Enhedslistimit qineqqusaarutit ilaat Arabiamiusut Kinamiusullu allassimasut Københavnimi nivinngaassorneqarput.