Enhedslistermiut najuutinngillat

- Dronningip ukiunik 40-nngortorsiornera ataqqiniarlugu Folketingip siulittaasua oqalugiartussaavoq, allamik naamik, taamaattumik folketingip ataatsimiittarfianiinnissarput pisariaqartissimanngilarput, Per Clausen Enhedslistimeersoq oqarpoq.

Radikalit sinnerlugit folketingimi ilaasortaq Zenia Stampe, kunngiitsuuniat suliniaqatigiiffiannik aallarniisoq, Dronning Margrethep folketingip ataatsimiittarfianiinnerani aamma najuutinngilaq.

Zenia Stampep najuutinnginninni annertunerusumik nassuiarusunngilaa.

- Isumaqarluinnarpunga inuit amerlanerit nalunngikkaat sooq najuutinngitsunga, taamaattumik tamanna pillugu annertunerusumik oqaaseqarsinnaanngilanga, Zenia Stampe oqarpoq.

Kunngiitsuuniat suliniaqatigiiffiata Den Republikanske Grundlovsbevægelsep, Dronning Margrethe nalunaaqutaaqqamik guldiusumik tunissuteqarfigaa, tamanna imak isumaqartinneqarluni,  kunngeqarnerup imaluunniit kunngikkormioqarnerup soraarninngorfissaa nalliummat.

Dronningi ataatsimiittarfimmut isermat politikerit arlaqartut ileqqoq malillugu nikuinngimmata persuarsiutigineqarpoq aalassassimaarutigineqarluni.

Avatangiisinut ministeri Ida Auken SF-imeersoq, ukiortaaq Amalienborgimi nalliussineqarmat iseriartorluni Dronningip takunerusarnissa pisariaqannginnerarlugu oqarmat nuannarineqarunnaavissimavoq.