Enhedslistenip Palantir Amerikamiuneersoq Danmarkimi inerteqqutaalersikkusukkaa

Enhedslistenip Amerikamiut suliffeqarfiutaat Palantir, Danmarkimi isertortumik paasiniaasartunut qarasaasiatigut atugassanik ilaatigut pilersuisartoq,  sivisuumik isornartorsiugaraa.

Qarasaasianut programmit Palantirimeersut Danmarkimi naalagaaffeqatigiinnermilu politiini, politiit isertortumik paasiniaasartuini (PET) pisortallu allaffeqarfiini inerteqqutaasariaqarput.

Enhedslistenip politikkikkut oqaaseqartartua, Pelle Dragsted taama isumaqarpoq.

Partiip aasaanerani ataatsimiinnissaa ataasinngornermi pisussaq sioqqullugu taama nalunaaruteqarpoq.

Enhedslisten naalakkersuisoqatigiinnut qiterlermiit saamerliup tungaaniittunut tunngaviupput.

Enhedslistenip aningaasanut inatsisissatut ukioq manna isumaqatiginninniarnernut atatillugu, danskit oqartussaasuisa softwaremik Palantirimeersumit atuisut akornanni, softwaremik danskinit Europamiunilluunniit suliarineqartumik taarsersuisoqarnissaannut aningaasanik immikkoortitsisoqarnissaa piumasaraa.  

- Palantirip Danmark Kalaallit Nunaallu pillugu paasissutissanik USA-mit aallerfissatut atorneqarsinnaanera ernummatigaarput. Qarasaasiakkut suliaqarnerup tungaatigut nammineersinnaassuseqarnissamut nammineersinnaanermullu tunngassuteqarpoq. Trumpip taassumalu naalakkersuisuisa tungaannit eqqoruminartuussanngilagut, taakkumi sanngiiffik pinngitsuuisinnaanerlu sunaluunniit tatisinissaminnut sakkugisaraat nalunngilarput, Dragsted oqarpoq.

Ajornartorsiuterujussuaq

Taassuma Amerikamiu aningaasaatilissuaq Peter Thiel, Palantirimik pilersitseqataasoq, USA-llu præsidentianik Donald Trumpimik tapersersuisuusutut ilisimaneqartoq innersuussutigaa.

USA-p præsidentiata Kalaallit Nunaata tiguarnissaa piffissami sivisuumi kissaatiginerartarpaa.

Palantir qarasaasiatigut paasissutissanik misissuinermut softwarenik USA-p naalakkersuisuinut pilersuivoq. Palantirip Trumpillu akornanni attavik arlaatigut qanippallaarpoq, Dragsted isumaqarpoq.

Dragstedip Palantirip qarasaasianut softwareutaata imaaliallaannaq taarserneqarsinnaannginnera nalunngilluinnarpaa.

- Soorunami tamanna Palantirip suliaannik atuisunut, assersuutigalugu Naalagaaffiup politiivinut, ajornartorsiulersitsinani pissaaq. Allanilli periarfissaqarpoq, Dragsted Tysklandip Frankrigillu Palantirimut taarsiullugu franskit pilersitaannik misissuinerat innersuussutigalugu oqarpoq.

- Uagut assinganik misissuisinnaavugut. Tamanna ullormiit ullormut pisinnaanngilaq, Danmarkilli qarasaasiatigut aqqissuussinermi mianernarnerpaani, tassa politiini, Trumpip atornerlussinnaasaanik softwareqarneq ajornartorsiuterujussuuvoq, Dragsted oqarpoq. 

Aamma nunat allat, soorlu Spania Tuluit Nunaallu Palantirimut taarsiutaasinnaasumik piffissami kingullermi ujartuipput. Tamanna teknologiikkut nammineersinnaassuseq innersuussutigalugu pivoq.

- Palantirip inerteqqutaalernissaa Enhedslistenimit aningaasanut inatsisissatut isumaqatiginninniarnermi pinngitsoorani piumasaqaataanavianngitsoq, Dragsted oqarpoq.  

Taassumalli siunnersuutip naalakkersuisunit pimoorullugu misissorneqarumanissaa naatsorsuutigaa.

RITZAU