EnCana aappassaa uuliasiornissamut akueritippoq
januaarip 20-at 2005 15:03
Canadamiut uuliasioqatigiiffissuat, EnCana Corporation, Nuna Oil suleqatigalugu Nuup avataani nutaamik uuliasiorfissarsivoq.
Misissuifissaq Nuup kitaani 250 kilometerisut avasitsigisumiippoq, 2893 km2 -sut annertussuseqarluni.
Canadami uuliasioqatigiiffissuaq EnCana Atammiup avataani akuersissummik peqareerpoq, 2002-mi pissarsiarisaminik.
Sumiiffiup sananeqaatsimigut annertuumik soqutiginaateqarnera, Kitaanilu uuliamik aniasoqarfeqarnera ilisimaneqareernerarlugu, uuliamik nassaarnissaq 10 procenti angullugu ilimanaateqarsinnaasoq, EnCanap pisortaa John K. Brannan oqarpoq.
-Sajuppillatsitsinerit atorlugit misissuissaagut, taakkulu ajunngitsumik takussutissiippata uuliasiornissamut suleqatissarsiussaagut, John K. Brannan oqarpoq.
