Emilie Lennert toquvoq

Sisimiuni ataqqinaammik innuttaasoq Emilie Lennert, 87-inik ukioqarluni toquvoq.

Allattoq Mads Lynge

maajip 06-at 2019 17:36

Emilie Lennert arnani politikerit siulliit ilaanniippoq, 35-nik ukioqarluni Sisimiuni kommunalbestyrelsiusimasumut 1967-imi qinigaalluni. Sisimiut Kommuniani 1975-imi borgmesterinngorpoq.

Emilie Lennert kommunalbestyrelsimi 1967-imit 2001-ip tungaanut katillugit ukiuni 34-ni ilaasortaavoq, taakkunannga ukiuni aqqaneq-marlunni siulittaasutut borgmesteritulluunniit. Qeqqata Kommuniani borgmesteri Malik Berthelsen eqqaaniaalluni taama ilaatigut oqarpoq.

Kommunalbestyrelsimi ilaasortaanermi saniatigut inatsisartunut 1984-imit 1995-ip ukiuni aqqanilinni ilaasortaavoq, kommunit kattuffiata KANUKOKA-p 1972-imi pilersinneqarneranut ilaatigut peqataalluni.

Emilie Lennert Namminersornerullutik Oqartussat nersornaasiuttagaannik Nersornaammik sølviusumik 1997-imi nersornaaserneqarpoq, Sisimiunilu ataqqinaammik innuttaasutut 2002-mi toqqarneqarluni. KANUKOKA-mit 2017-imi aamma ataqqinaaserneqarpoq.

- Sisimiut ullutsinni illoqarfittut ingerlalluartutut, pisoqarfiusutut eqeersimaarfiusutullu ilisimaneqarneranut annertuumik ataqqineqaatigivaa. Malik Berthelsen, Emilie Lennertimik eqqaaniaanermini taama ilaatigut oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.