EM Taekwon-Do: Bronzit marluk kalaallinut
Bronzinnattut tassaallutik inuusuttuaqqani piukkunnaateqarluartoq nutaaq, Heidi Rasmussen aamma misilittagaqarluartoq Lauritz Heilmann, taakkua TUL-imi unamminerminni bronzinnapput. Angusarineqartut ajunngeqaat, tassami unammineq ilungersunaqaaq, nunani assigiinngitsunit 31-nit peqataasut 700-t unammisaqattaaramik.
- Naatsorsuutigisatsinniit peqataasut amerlanerujussuupput, nunatsinni Taekwon-Dortartut peqatigiiffianni siulittaasoq Morten Holm Kroatiamiit taama oqarpoq.
Inuusuttuaqqap Heidi Rasmussenip angusaa taassuma immikkut taavaa. Heidi siullerpaamik Europami pissartanngorniunnermut peqataavoq, taamaattorli TUL-imi 25-nit peqataaffigineqartumi normu 3-nngorpoq pissartanngorniutivinnernullu annguteriarluni bronzinnalluni.
- Heidi timersuummi ilungersunartumi siunissarissaaqaaq, Morten Holm oqarpoq, taassumalu kalaallit peqataasut angusaqarluarnerat pillugu nersualaarpai, oqarluni aallartinnermiit unammeqattaarnerit makitseqattaarnikkut ingerlanneqarnerat ajornartorsiornarsimasoq. Aappaagu Taekwon-Do-mi Europami pissartanngorniunnisssaq Sloveniami ingerlanneqassaaq.