EM-mi arsaanneq: Asii Kleist Berthelsen Danmark sinnerlugu marloraarpoq

17-nik ukiulik Asii Kleist Berthelsen Nuummeersoq nissuminik saamerlermik nakernermik takutsitseqqippoq pingasunngornermi unnukkut.

Tassanimi marloraarpoq qallunaat U-19-ni nunanut allanut unammisartui EM-mut anngunniunnermi Tyrkiamut 6-0-mik ajugaammata sulilu unamminerit pissanganartut marluk aqqusaassavaat.

Østerbro Stadionimi sialuk kuuttuinnaasoq Asii Kleist Berthelsen paarlatsissamaataalluni aallartippoq mumereermilu aatsaat iserluni.

AAMMA ATUARUK Champions League: 17-nik ukiulik Asii Kleist Berthelsen oqaluttuarisaanermut ilannguppoq

Isernerminiilli isertitsiniaqattaarluni sukataarluarpoq.

- Unamminermi minutsini 20-ni isersimavunga tassanilu marloraarlunga. Tamanna naammagisimaarluarpara. Suli amerlanernik periarfissaqaraluarpunga taamaattorli isertitakka naammagisimaarlugit, Asii Kleist Berthelsen KNR-mut oqaluttuarpoq.

Qallunaat U-19-ni unammisartui Tyrkiamiit malunnartumik pikkorinnerupput. Asii Kleist Berthelsenilu neriuppoq takutitsilluarnini unamminerni tullerni suli sivisunerusumik isersimanermik kinguneqarsinnaassasoq arfininngornermi Ungarn unammineqareerpat marlunngormat Finland unammissagamikku.

Asii Kleist Berthelsen aamma maannakkut U-19-ni unammisartuusut siornatigut Ungarn aamma Finland unamminikuunngilaat. Taamaattoq Tyrkiamut arsarluarnerat neriullualersitsivoq.

- Iligiinni suleqatigiilluarpugut. Unammisassavut tulliit marluk siornatigut unamminikuunngikkaluarlugit ajugaaffigisinnaanissaat upperaara, Asii Kleist Berthelsen oqarpoq.

U-19-ni EM-rtoqarnissaa aappaagu junip naaneraniit Tjekkiami pissaaq.