Taama pili: Elsa saamisut oqaluttoq

Finlandimiut tusagassiorfiat YLE taama allaaserisaqarpoq.

Tamanna saamit Norgep avannaaniittut, Sverigemiittut Finlandimiittullu misigisussanngorpaat, tassami filminik saqqummersitsisarfiup Disneyp filmiliaa nuannarineqarluartoq Frozen 2 saamit oqaasii atorlugit filmiliarineqartussanngorpoq.

Saamit siunnersuisoqatigiivisa aamma saamit inatsisartuisa siunnersuisoqatigiivi kiisalu filminik saqqummersitsisarfiup Walt Disney Animation Studiop suleqatigiinnerisigut Disneyp filmiliaa Frozen 2 saamit oqaasii atorlugit saqqummersinneqassaaq.

Norgemi Sverigemi Finlandimilu saamit oqaaseqartartui tusagassiuutinut nalunaarutikkut suleqatigiinnerup nuannaarutigineqarnera oqaatigaat.

- Suleqatigiinnerput qujamasuutigalugulu tulluusimaarutigaarput.

- Naalagaaffiit peqatigiinnimi nunap inoqqaavisa kinguaavisa oqaasii ukioq manna nalliuttorsiutigineqarnerat eqqorlugu, filmi Frozen 2 oqaatsivut atorlugit meeqqatsinnut takutinneqarsinnaalissammat nuannaarutigaarput, saamit oqaaseqartittagaat taama oqarput.

Filmiliami nutaami Frozen 2-mi saamit oqaasii kisimik pineqanngillat.

Filmimi malinnaaffigineqarput Elsa taassumalu qatanngutaa arnaq kiisalu taakkua ikinngutaat Kristoffer.

Oqaluttualiani nalinginnaasuni angut pinnersoq hiistimi qaqortumik qalipaatilimmi hiistertarpoq, filmimili uani Kristoffer tuttu hiisteralugu ingerlaarpoq.

Avannaarsuani nunami ilisimaneqanngitsumi kunngeqarfik annaanniarlugu ingerlasariaqarput, Elsap piginnaasai angakkuarnikkut pigilersimasai iluaqutigalugit.

Ingerlaarnerminni saamit nipilersugaat tusarnaarpaat aamma saamit atisaat atorneqarput, tassalu aamma Kristoffer tuttumik hiistertoq takullugu.

Saamit avannarliit oqaasii saamit oqaasii suli atorneqartut qulingiluaasut ilagaat.

Saamit 15.000-it missaannittut saamit inunnguuseralugu oqaasiinik oqaluttarput, tassalu nunarsuarmi saamit 75 procentiisa oqaatsitik suli atorpaat.