Ellen taaseqataanngilaq
Peqqissutsimut Avatangiisimullu Naalakkersuisoq Asii Chemnitz Narup, ippassaq naalakkersuisuuneranit demokratinit uppiseriarneqaraluarpoq, naalakkersuisooqatigiilli Asiip issiaannarnissaa qulakkeerpaat.
Ippassaq immikkut ittumik inatsisartuni ataatsimiittoqarnerani, Asiip issiaannarnissaa taasissutigineqarmat, Ellen Christoffersen Atssummeersoq nikueqataanngilaq, tamannalu Ellen-ip ima nassuiarpaa.
- Taaseqataaniarnanga aalajangerninnut peqqutaavoq nammineq inuttut isummersinnaassusera. Nammineq isummersinnaanera atorluarniarlugu taaseqataanngilanga. Taaseqataannginninni takutippara akuersaarnagulu itigartinnginnakku. Ilaatigut siunnersuutigineqartup oqaasertai isumaqatigisinnaangakkit, illuatungaanili isumaqarama kukkunersuisut sulinerat ataqqineqanngippallaartoq, taamaattumik uanga nammineq inuttut isummersinnaassusera atorluarpata, Ellen Christoffersen oqarpoq.
