Atassutip inatsisartunut ilaasortaatitaa Ellen Christoffersen siulittaasuminit Finn Karlsenimit inissinneqanngilaq, Atassulli sinnerlugu oqaaseqartartut ullumimit tassaalerput, partiip siulittaasua Finn Karlsen aamma Inatsisartut gruppeanni siulittaasoq Augusta Salling.
Ellen Christoffersenip imaatigut angallannerup aningaasassarsiuunneqarnissaanut partiini Atassut piareersimanerarlugu oqaaseqarsimanera Inatsisartut gruppeata ullaap tungaa oqaluuseraa.
- Sinersortaatit angalaqqilernissaat pillugit Ellen Christoffersenip oqalunnera illersorsinnaavara, aningaasanilli taakkartuereerluni partii isumaqatigiinniarnissamut piareersimanerarlugu oqalunnera isumaqatiginngivillugu. Atassutip siulittaasua Finn Karlsen nassuiaavoq.
Finn Karlsen aamma oqarpoq, Naalakkersuisut umiarsuit ingerlaqqilernissaannut saqqummiussassamik suliaqartitsisut, saqqummiunneqartussallu tunngavigalugit Naalakkersuisut isumaqatigiinniassasut.
- Taamaattumik aningaasanik taakkartuilluni isumaqatigiinniarnissanullu piareersimaneraalluni oqalunnerit isumaqatiginngivippakka. Finn Karlsen qalleqqissaavoq.
Naalakkersuisut siulittaasuata Hans Enoksenip piumasarisimavaa, Finn Karlsen siulittasuunini takutillugu inissiisariaqartoq, Ellen Christoffersen inissinneqarsimanerluni?
- Naluara oqartoqarsinnaanersoq inissiisoqartoq. Oqaloqatigiippugut, aningaasanilli maannangaaq taakkartuilluni oqaluttoqarnera akuerisinnaanagu ullaap tungaa oqaatigaara. Finn Karlsen erseqqissaavoq.
Finn Karlsen aamma erseqqissaavoq, Naalakkersuisut siulittaasuat Hans Enoksen inisseeqqusilluni piumasaqaqqinniaruni toqqarluni saaffiginnittariaqartoq.
