Ellemann: Issittumi illersornissaq nukittorsarneqarli
ISSITTOQ: Danmark Kalaallit Nunaallu Issittumi pissaanilissuartut piviusorsiortumik isigineqassappata Naalagaaffeqatigiit Issittumi malunnaatilimmik sakkutooqarnikkut annertusaasariaqarput.
Danskit nunanut allanut ministererisimasaat partiillu Venstrep siulittaasorisimasaa, Uffe Ellemann-Jensen, Danmarkip Radioanut taama oqarpoq. Naalagaaffiit Peqatigiit immap naqqata nunavimmut atasortaa pillugu ataatsimiititaliarsuannut 900.000 km2-inik piginnittussaanermik Naalagaaffeqatigiit piumasaqaateqarnerisa kingorna taama oqarpoq.
- Piumasaqaateqarnerput ilumut pimoorullugu ersersinniassagutsigu, taava naalagaaffiup ilaani nakkutilliinerput annertunerulersittariaqarparput, Ellemann-Jensen Danmarkip Radioanut taama oqarpoq.
Sakkutuut nakkutilliitinneqartut amerlagisassaanngitsut
Issittumi Sakkutooqarfik Nuummi inissisimasoq kunngeqarfiup Issittumi pigisaanik nakkutilliisuuvoq, ilaatigut umiarsuit alapernaarsuutit “Ejnar Mikkelsen” aamma “Knud Rasmussen”, timmisartoq Challenger, qulimiguullit aammalu Sirius-patrulje atorlugit.
Tamannali annertugisassaanngilaq, Ellemann-Jensen isumaqarpoq.
- Ullumikkut nakkutilliitinneqartut tassaapput umiarsuit - pitsassuugaluarlutik - mikisuaqqat. Umiarsuit alapernaarsuutitoqqat qiviaraanni, taakku (maanna atorneqartut, aaqq.) pikkugisassaanngillat. Taakkulu saniatigut Sirius nakkutilliitinneqarpoq. Sakkutuut pitsassuit pikkorilluinnartut. Naalagaaffiulli ilaani nakkutilliinerput annikippallaarujussuarpoq. Taamaammat siunissami umiarsuarnik aammalu timmisartunik nakkutilliineq annertunerusoq pisariaqartissavarput, Danmarkip Radioanut oqarpoq.
Akersuuffiussanngilaq
Pingaartumik Rusland ukiuni kingullerni Issittumi sakkutooqarnikkut annertusaasimavoq.
2013-imit 2017-imut Illersornissaq pillugu isumaqatigiissummi danskit naalagaaffiat Issittumi suliaqarnini annertusiniarlugu aalajangersimavoq. Atortorissaarutilli qanoq amerlatigisut suussanersullu nalunaarusiami upernaap ingerlanerani saqqummertussatut naatsorsuutigineqartumi aatsaat paasinarsissapput.
Sakkutooqarnikkut qanoq annertusaatigisoqaraluarpalluunniit Issittup sakkutooqarnikkut akersuuffiunnginnissaanik siunertaqarneq attanniarneqartuassasoq Uffe Ellemann-Jensenip erseqqissaatigaa. Tamannalu danskit illersornissamut ministeriata, Nicolai Wammenip, KNR-imut mailikkut allakkamini aamma naqissuseqqippaa:
- Issittoq danskit naalakkersuisuisa pingaartitaralugu suliniuteqarfigaat, aamma Issittumi illersornissamut suliniuteqarneq nukittorsarneqareerpoq, tamannalu illersornissaq pillugu maanna isumaqatigiissutaasumi ilaatigut atuarneqarsinnaavoq.
- Issittumi suliniuteqarnermut suliniutissat tigussaasut arlallit isumaqatigiissummiipput, ilaatigut umiarsuup alapernaarsuutit umiarsuup Knud Rasmussenip assinganik pingatserneqarnissaat kiisalu qulimiguulinnik umiarsuarmiunik SEAHAWK-inik ilaatigut issittumi atorneqartussanik pissarsinissaq.
Peqatigitillugu Issittumi sakkutooqarnikkut danskit pisariaqartitaannik misissueqqissaarisoqarnera danskit naalakkersuisuisa utaqqivaat. Tassungalu tunngatillugu nalunaarusiaq upernaap ingerlanerani saqqummiunneqartussatut naatsorsuutigineqarpoq. Tamanna pereerpat Issittumi sakkutooqarnikkut annertusaaqqittoqassanersoq danskit naalakkersuisuinit isummerfigineqartussaassaaq.
