Elisabeth Johansen ullumikkut 100-liisussaagaluarpoq
Ullumikkut ulloq aggustip aallaaqqaataat tassaavoq nunatsinni politikeriusimasup ilisimaneqarluartullu Elisabeth Johanseniugaluup inunngorfia.
Tassa Elisabeth Johansen ullumikkut 100-liisussaagaluarpoq, Uummannamilu inunngorsimasuugami Uummannami nalliuttorsiutigineqassaaq.
Nalliuttorsiorneq nalunaaqutaq ataatsimut aallartissaaq.
Titartaanermik unammisitsisoqassaaq kransiliisoqassallunilu timersortarfimmilu pisussaqarluni.
Nereqatigiittoqassaaq aliikkusersuisoqassallunilu.
Naggasiutigalugu qittattoqassaaq. Elisabeth Johanseniugaluup ernerisa ilaat Lars-Emil Johansen siuttoralugu kalattuunik appisimaartoqassagami. Lars-Emil Johansen and his Soul Mates kalattuunik appisimaassapput.
Elisabeth Johansen ilanilu politikkimik soqutigisaqartuusimapput, meeraallunilu politikkimit sunnersimaneqarluni.
Ataataa tassaavoq Johan Henningsen avannaata Landsrådiani ilaasortaasimasoq. Landsrådi 1911-mi pilersinneqarmat Johan Henningsen ilaasortanngorsimavoq.
Elisabeth Johansen juumuutut ilinniarsimasuuvoq, 1931-mili juumuutut sulisimalluni.
Landsrådimut qinigassanngortinneqarnissaminut kajumissaarneqarsimavoq, Landsrådimilu arnartatuaalluni 1959-imiit ilaasortanngorluni. Elisabeth Johansen 1975-ip tungaanut Landsrådimi ilaasortaavoq.