Sanigorsartitsinnginnermi tamatumalu kingorna: Elionora Paviassen 17 kilonik oqinnerulerluni sanigornerpaavoq.Assi: Kommune Kujalleq

Elionora sanigorsartitsinermi 17,4 kilonik oqinnerulerluni ajugaasoq

Qassiarsuup eqqaani savaateqarfimmi Qorlortumi najugalik, Elionora Paviasen, sanigorsarluni aallartikkami 108 kilonik oqimaassuseqarpoq.

- Kiilorpassuit katakkakkit qujamasoqaanga.

Kommune Kujallermi sanigorsartitsinermi oqinnerulertuni ajugaasoq, Elionora Paviassen, taama oqarpoq. 

127-t peqataapput – Elionorali sanigorsartitsineq januaarip naanerani aallartinneranili 17,4 kilonik oqinnerulerluni sanigornerpaavoq. 

Sanigorsartitsineq qaammatinik pingasunik sivisussuseqarpoq.

Qassiarsuup eqqaani savaateqarfimmi Qorlortumi najugalik, Elionora Paviasen, seeqquminik ajoquteqarluni timersorsinnaanginnami nerisani allanngorterujussuaannarlugit 17 kilonik oqilisimavoq.

Sanigorsarluni aallartikkami 108 kilonik oqimaassuseqarpoq. 

- Peqqinnannginnami. Allaat aannik qullartoortalerlunga, taanna oqarpoq. 

 

 

- Taava aallartinngilaartut sapaatip akunnera sioqqullugu aaliangerpunga, naagga uanga tassa sanigorsartariaqarpunga. Taava aallartippunga, taanna oqarpoq. 

Neqitussaarluni aalisagartornerulerpoq, kaagisussaarpoq taavalu inerititartorluartalerlunilu naatitartorluartalerpoq. 

- Sapaatit akunnerat siulleq soorunami artornaqaaq. Sukujugukkaangama paarnarsuarnik qaqortunik tamuluttarpunga. Qassiarsummi ilaannikkut iipileeruttarami allanilluunniit naatitaaruttarami.

Kommune Kujallermi pitsaaliuinermik immikkoortortaqarfik sanigorsartitsinermik unammisitsilluni januaarip naalernerani aallartippoq - immikkoortortaqarfimmilu aqutsisup Helga Nielsenip Elionora nersualaarpaa:

- Piumassuseqarnerminik takutitsivoq, najukkaminilu periarfissani killeqaraluartut nammineq iliuuseqarsinnaalluni takutippaa. Imminut unamminera assut kusanarpoq, taanna oqarpoq.

Lommuni inuit timimik aalatitsinerulersikkullugit sanigorsartitsinermik unammisitsivoq – Maja Christensenilu Qaqortumeersoq timimik aalatitsinerulertunut ilaavoq. 

Taannali Elionoratulli sanigortiginngilaq, sanigorsarlunilu aallartikkami 90 kilonik oqimaassuseqartoq 4 kilonik oqilisimavoq.

Taannali sanigorsaqataasunut kaammattuillunilu maligassiuilluartarsimammat kajumissaammik tunineqarpoq. 

- Qiimanerulerpunga, takorloorparalu ingerlatiinassallugu. Freerfinni silagikkaangat qaqqamukartassaanga, Maja Christensen oqarpoq.

Sanigorsartitsinermi angusarinnerpaat tallimat pokaalinnapput

Elionora Paviassenilu Iwatchimik aamma nalunaaqutaarannappoq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat