ELFO Grønland atorunnaarpoq, allaffissornertaalu GA-p isumagisarilerpaa
Tamanna arlaleriarlugu sulissutigineqartarsimagaluarpoq, ELFO-lli aningaasaataasa sumut atorneqassanersut isumaqatigiissutigineqarsinnaasarsimanani. Tamannali maanna isumaqatigiissutigineqarpoq, aningaasaatit 400.000 kr.-iusut aningaasaateqarfimmut innaallagisserisunngorniarlutik immikkut suliniuteqartunut tapiissuteqartartussamut nakkartinneqassapput.
-Siulersuisut tamanna suliaqarfitsinnut pitsaanerpaatut isigaat. Taamatut aaqqissuussinitsigut GA aqqutigalugu pitsaanerpaamik angusassaagut, aamma aaqqissuussaanikkut nukittunerulissaagut, ELFO-p maannamut siulittaasorisaa Alex Nørskov oqarpoq.
Kalaallit Nunaanni Sulisitsisut Peqatigiiffiata tungaanit suleqatigiinneq nutaaq aamma naammagisimaarneqarpoq. Aningaasaateqarfittaaq innaallagisserisunngorniartunik kajumilersitsiinnarani aamma GA-p aaqqissuussaanikkut nukittorsaatigissavaa.
-AAqqissuussineq pitsaalluinnartoq anguarput. Aningaasaaterqarfittaaq innaallagisserisunngorniartunik kajumilersitsissaaq. Assassorissatigut suliaqarfiit artornarnersaanni ilinniartitsisoqarnissaa unamminartupilussuusimavoq. Tamakkulu "Tekniq"-imik suleqateqarnitsigut aaqqinniarnissaat sulissutiginiarparput, taamaalilluta siunissami maani nunatsinni innaallagisserisunik pikkorissorsuarnik pigisaqalerniassagatta, Karsten Klausen GA-meersoq knr.gl-imut oqarpoq.