El Chapo inuunini naallugu parnaarussassanngortinneqartoq
Joaquin Guzmán Loera inuunini naallugu parnaarussassanngortinneqarpoq, tamatuma saniatigut sakkunik atuisimanerminut ukiuni 30-ani parnaarussassanngortinneqarluni.
New Yorkimi eqqartuussisup unnerluussisussaatitaasut kissaataat malippai, taamaalilluni El Chapo inuunini naallugu parnaarussivimmiittussanngortinneqarpoq.
Eqqartuussineq naammassinngitsiartoq Guzman oqaaseqarami oqarpoq, qaammatini 30-ni parnaarussaaqqanermini sakkortulluinnartumik inuppalaanngilluinnartumillu naalliutsinneqarsimalluni.
Reuters ilaatigut taama allaaserisaqarpoq.
- Uannut suliaq ammip qalipaataanik immikkoortitsineruvoq naapertuilluartumillu eqqartuussineq ingerlanneqanngilaq, USA-mullu tunniunneqarama naatsorsuutigigaluarpara naapertuuttumik eqqartuussineq ingerlanneqassasoq, muminganili ingerlasoqarpoq Guzman oqarpoq nangillunilu:
- Nunarsuarmi nunat peqquserluffiusuni USA pitsaanerunngilaq.
Eqqartuussisup Brian Coganip aamma naalakkiutigivaa, 84 milliardit koruunit missaat arsaarinnissutigineqassasut, arsaarinnissutit USA-mi ikiaroornartumik nassiussuisatut iluanaarutaasimapput.
/ Ritzau