Oqaatsinik ilinniartitsineq immikkut ilisimasalinnit misissorneqassaaq
Atuartut kalaallisut, qallunaatut tuluttullu oqaatsitigut piginnaasaat patajaallisarneqarnissaat anguniagaasoq naalakkersuisut nalunaarutigaat.
Suleqatigiissitaq immikkut ilisimasalinnik inuttaqartussaq, Ilisimatusarnermut, Kultureqarnermut, Ilinniartitaanermut Ilageeqarnermullu naalakkersuisumit Doris Jakobsenimit taamaammat pilersinneqarpoq, oqaatsini ilinniartitsineq suleqatigiissitamit misissorneqartussanngorluni.
AAMMA ATUARUK Minik Rosing: Kalaalinngorsaanerup meeqqat atuarfiat aserorpaa
- Nunatsinni meeqqat atuarfiat pillugu Danmarks Evalueringsinstitutip nalunaarusiaa atuareerlugu, uannut ersarilluinnarpoq, atuarfitsinni oqaatsinik ilinniartitsneq annertuumik pitsanngorsaavigineqartariaqartoq. Suliassaq annertuvoq, angusaqarluassaguttalu aallaqqaammut misilittakkatigut ilisimasatigullu tunngavissaqarluartariaqarpugut. Suliassaq tamanna immikkut ilisimasalittut suleqatigiissitat aallartilerpaat, inerniliiumaarnerallu assut pissangagivara, Doris Jakobsen oqarpoq.
Suleqatigiissitat immikkut ilisimasalinnit Nunatsinnit, Islandimit, Danmarkimit Canadamillu inuttaqassapput.
Siulittaasoq tassaavoq Anne Holmen, arlariinnik oqaaseqarnermik Københavnip Universitetiani professori.
