Eksperimentip kinguneri Kuupiup nuannaarutigai
Danskit naalakkersuisuinik suleqateqarneq annertunerpaatigut ingerlalluarpoq suleqatigiinnerpullu ataqqeqatigiinneq tatigeqatigiinnerlu tunngavigalugit ingerlanneqarpoq. Nunatta siorna aasakkut namminersornermut ikaarsaarsimanerata ataqqineqarnera malunnarpoq, naak politikerit ataasiakkaat tutsiuttarnerat qanga isummersortaatsinut eqqaanaraluaqisoq, naalakkersuisut siulittaasuat Kuupik Kleist oqarpoq, nangillunilu:
- Taamaakkaluartoq nunasiaataanerup nalaani ukiunilu tamatuma kingorna pisimasut nuanninngitsut sulilu inuppassuarnut nanertuutaasut puttallartuartut qaangerniarlugit assigiinngitsutigut suliniuteqarneq imaannaanngitsuuvoq. Qujanarpoq innuttaasut akornanni qulaajaanissamik aaqqiissuteqarnissamillu ujartuinerit qasujuilluni ingerlanneqarmata. Pingaartumik meeqqat kalaallit eqqunngitsumik pineqartarsimanerannik qulaajaanissaq siunertaralugu Naalakkersuisut danskit naalakkersuisuinik suleqateqarpugut qulaajaanerit kingorna pisarialimmik iliuusissat tunngavissikkumallugit.