"Eksperimentet" attortinnaqaaq, sakkortullunilu pingaaruteqarpoq
Filmi naammassimmat ilitsersuisoq Louise Friedberg apeqquteqarfigineqarpoq, oqallittoqarporlu.
Louise Fridbergip oqaasii Stephen Heilmannip ima nutserpai:
- Uanga nammineq inuttut nuannaarutigisorujussuuvara filmip uuma nunarsuarmi takuteqqaarneqarnera Nuummi pisinnaammat.
Inunnik isumaginninnermut Naalakkersuisoq, Maliina Abelsen, aamma najuuppoq. Taanna aamma nuannaaqaaq. Maliina Abelsenip oqaasii Stephen Heilmannip aamma kalaallisuunngortippai:
- Siullermik pilluaqqorusuppassi filmimik taamaattumik sanasinnaasimagassi, aammalu neriuppunga takutinneqaqattaarnermini iluatsilluarumaartoq. Uanga nammineq misigisara tassaavoq soorlu suna qulaaninngaaniit isigalugu, misigissutsit aqqarfigalugit, pingaartumik meeqqat taakku isigalugit misigissutsit imaannaanngitsut tikillugit, taamaattumik assorujussuaq pilluaqqorusuppassi.
Naalakkersuisut siulittaasuat, Kuupik Kleist, isumaqarpoq, filmi pingaarutilerujussuusoq:
- Taanna aallaavigalugu oqassaguma uagutsinnut pingaaruteqartoq tassaavoq ukiuni makkunani Danmarkip Nunattalu akornanni pisimasut ilumoortumik qulaajarneqarnerat, aamma tamatuma nutaamik peqatigiinnermut aqqutaasinnaanerat, uagullu akunnitsinni immaqa qulaajartariaqartut, suli annertuut, qulaajarneqarpata inooqatigiinnerput peqatigiinnerpullu immaqa pitsaanerulersinnaassapput, taanna qujassutigerusuppara.
Filmi Eksperimentet septembarip ulluisa qulingiluaanniit tamanit isiginnaariarneqarsinnaalissaaq.