Ejvind Elsner aamma Ole Christiansen nersornaaserneqarput
GrønlandsBankip inuussutissarsiorneq pillugu aningaasaateqarfiani siulittaasup, Kristian Lennertip, nersornaatit suliffeqarfinnut assigiinngeqisunut marlunnut tunniuppai. Nersornaasiuttagaq 50.000 koruuninik nalilik sulisitsisut tunniusimallutik suliniuteqarsimasut marluk avippaat.
Sulisitsisullu taakku marluk, tassa nipilersuutaarniarfiutigaluni immiussisarfimmi, Atlantic Musicimi, piginnittoq, Ejvind Elsner, kiisalu aatsitassanut atatillugu suliffeqarfimmi, Nuna Mineralsimi, pisortaq, Ole Christiansen.
Kristian Lennert nersornaasiinermini oqarpoq, inuit taakku marluk teknikkikkut misilittagaqarnikkullu pisinnaasaat kattukkaanni, sulerululluni tunniusimagaanni angusaqarluarsinnaaneq takutikkaat.
Aatsitassanik nipilersornermilluunnit suliaqaraluaraanni siuariartortitsisinnaaneq, nunarsuarmioqatitsinnullu pingaartitatsinnik nittarsaassisinnaaneq, inuit taakku marluk takutippaat - tassa kuultinik nipilersullaqqissunulluunniit tunngasunik suliaqaraluaraanni. Tamakkua pissutigalugit Ejvind Elsner Ole Christiansenilu ukioq manna nersornaaserneqarput.
