Avaaraq Olsen Kommuneqarfik Sermersuumi borgmesterinngussaaq
![](/sites/default/files/styles/image_934x467/public/article_images/20220531125833_7v9a4304.jpg?itok=f9Yfujf3)
Inuit Ataqatigiinneersoq Avaaraq S. Olsen kommunalbestyrelsep marlunngornermi ualikkut ataatsimiinnerani Kommuneqarfik Sermersuumi borgmesterinngortussatut innersuunneqarpoq.
Innersuussinerlu kommunalbestyrelsemit akuerineqarpoq.
Avaaraq S. Olsen siorna kommunemut qinersinermi 241-nit taaguunneqarpoq. Taanna Kommuneqarfik Sermersuumi meeqqanut ilaqutariinnullu ataatsimiititami siulittaasuuvoq.
Avaaraq S. Olsenip Charlotte Ludvigsen taarserlugu borgmesterinngussaaq.
Charlotte Ludvigsen Kommuneqarfik Sermersuumi borgmesteriujunnaaniarluni tallimanngormat nalunaaruteqarpoq. Taassuma aalajangernera suliat ajorluinnartut arlallit kommunillu ineqarnermut susassaqarfiata aqunneqarneranik isornartorsiuisoqarnerata kingorna pivoq.
Taakku Namminersorlutik Oqartussat Nakkutilliisuisa kukkunersiuisullu nalunaarusiaata kingulliup taakkartorpaat.
![](/sites/default/files/styles/image_934x467/public/article_images/20220531123850_7v9a4231.jpg?itok=x06gvv0X)
Borgmesterip suliat marluk tassa aningaasanik atornissamut isumaqatigiissut aamma pisinissamik isumaqatigiissut tamarmik immikkut 20 millionit koruuninik aningaasartaqartut ilaatigut atsiorsimavai. Suliallu taakku marluk kommunimi politikerinit oqaluuserineqarsimannginnerat ajornartorsiutaavoq. Taakkuami kommunalbestyrelsimit akuersinertalimmik itigartitsinertalimmilluunniit oqaluuserineqarsimannginnerat qassiiliutaapput.
Charlotte Ludvigsen Qanoruumit apersorneqarnermini ima oqarpoq:
- Soorunalimi tunuarniutinnut peqqutaanerpaavoq, ukua atsiorsimasakka massakkut marlunngortut. Misigisimavunga tassani tatigineqarnera innarlerneqartoq. Aamma issiavinni issianiaannarlunga issianiarsarinianngilanga, innuttaasunit tatigineqanngikkuma.
IA aamma Naleraq kommunelbestyrelsemi amerlanerussuteqarput, IA qulingiluanik ilaasortaatitaqartoq Naleraq marlunnik ilaasortaatitaqarpoq.
Charlotte Ludvigsenip borgmesteritut atuuffimminit pisortatigoortumik juunip ulluisa 15-iannit atuukkunnaarniarluni nalunaarutigereerpaa.