Atuilluartuunissaq uukkatarineqarusuttoq

Saarlisaartorsuit immap naqqanut tullutik kalinneqaleraangamik, immap naqqanik aserorterilersarput assallatsiterilersarlutillu. 

Tamannali qullernik qalipaatilinnik atuinikkut pinngitsoortinneqarsinnaavoq. Qulliimmi qalipaatillit atorlugit raajat immap naqqaniit pissitsinneqarsinnaapput soorluttaaq saarlisaartorsuit taamak iliortartut.

-Qinngornerit atorlugit taarserneqarput, taamaalillutillu immap naqqani aserorterineq aammalu assallatsiterineq pinngitsoorneqarsinnaalluni, KNAPK-imi siulittaasoq Henrik Sandgreen KNR-imut oqarpoq.

Qulliit qalipaatillit atortoralugit raajanik kilisalernikkut immap naqqanut aserorteriunnaanginnarani, aamma mingutitsineq millisarneqarsinaavoq. Tassami qullernik qalipaatilinnik atuinermi saarlisaartorsuit kalinneranit orsussamik atuineq affaannanngorsinnaammat. 

Saarlisaartorsuarnik kalinnermi aalisariut assoroornermini orsussamik atuingaatsiartartoq. 
KNAPK-p siulittaasua nassuiaavoq.

Qalorsuit qullernik atuisut siunissami atugaalernissaat Henrik San

dgreenip neriuutigaa.
-Uanga nammineq takunnissimanera tunngavigalugu isumaqarama soqutiginartorujussuusoq, taannalu qujanartumik maanga anngupparput, seminarimilu saqqummiunneqarluni, nalunngilara takutinneqartoq peqataasunik assorujussuaq tupaallaatigineqartoq, Henrik Sandgreen oqarpoq.

Nunatsinni aalisarnermi periutsimut taamaattumut soqutiginnittoqalereersimavoq.
-Royal Greenland soqutiginnittoq paasivara, aamma soqutiginnipput namminersortut misileraanissaminnut taamatut, aamma seminarimi oqaatigineqarpoq peqataasut ilaanningaanniit nammineq soqutigisorujussuullugu taamatut misileraanissaq, Henrik Sandgreen oqarpoq. 

KNAPK-p Isumasioqatigiitsinerani Raajarniarneq pillugu Siunnersuisooqatigiinni ilaasortat, raajarniarnermi susassaqartut, qinikkat pisortaqarfinnilu ilaasortat kiisalu ilisimatuut Københavnip Universititetianinngaanneersut, Norgemilu imaani ilisimatusarnermut instituttimeersut peqataapput.