Eik Bankip immikkoortortaqarfini tunissagunarpaa
Savalimmiormiut aningaaseriviata ajornartorsiortup Eik Bankip, aningaaserivittut namminersortutut ingerlaannassaguni, kingusinnerpaamik ullumi 1,2 milliardit koruuninik pissarsiniartussatut piffissalerneqarpoq.
- Aningaaseriviup Savalimmiuni immikkoortua Eik Banki immikkoortinneqassaaq, qularnanngitsumillu Savalimmiuni aningaasaleerusuttut, taakkununnga ilaalluni sillimmasiisarfik TF, Aningaasaqarnermut nakkutilliisoqarfiup piumasaqaataannik 1,2 milliardit koruuniusunik aningaasaliisinnaasutut isigineqarluni, aningaaserivinnut immikkut ilisimasalik MyBankerimilu piginneqataasoq, John Norden, aviisimut Jyllands-Postenimut oqarpoq.
Taassuma naatsorsuutigaa, suliffeqarfiup Danmarkimi aningaaserivinnik ajutoortunik annaassiniartartup Finansiel Stabilitetip, aningaaserivimmik marsimi 9 milliardit koruuninik qularnaveeqqusiisup, aningaaseriviup qallunaanik sullissivittaanik tuniniaanissaq ingerlatissagaa. Pisisussanillu nassaarnissaq ajornarnavianngitsoq oqaatigalugu.
- Aningaaseriviup sullissai ajornerit 100-t piiarneqarpata, taava sullissat ingerlalluartut 100.000-it sinnerutissapput. Tamannalu aningaaserivinnut allanut, ingammik nunani avannarlerniittunut Danmarkimi ingerlatserusuttunut pilerinartuussaaq, John Norden oqarpoq.
Qanorluunniit pisoqassagaluarpat, Eik Bankip 1,2 milliardit koruuninik pissarsiniarnissaminut, sivikitsuinnarmik piffissalerneqarnini sivitsorniartussanngorpaa. Tassami piffissaliunneqartoq unnummut nalunaaqutaq arfinernut killeqarpoq. Tamatumalu sivitsorniarnissaa annerusumik ajornartorsiutaanavianngitsoq, immikkut ilisimasallit oqaatigaat.
