Egyptenimiit Danmarkimut saaffiginnissutit

Danmarkimi naalakkersuisut isummamik ilaat akiginngikkaluarlugit islamimik upperisallit killiligaanatik oqaaseqarfigisinnaagaat, Egitsinip qaammatit pingasungajaat matuma siorna periarfissippai.

Taama allappoq aviisi Danmarkimi ullut tamaasa saqqummersartoq, Politiken.

Egitsinimi nunanut allanut ministerip Danmark nunarsuarmilu inuiaqatigiit oktobarimi novembarimilu allakkatigut saaffigai, maluginiaqqullugu, aviisip Jyllands-Postenip eqqartuussisulersuunniarneqarnissaa ujartorneqanngitsoq.

Nunanut allanut EU-mi politikkikkut ataqatigiissaarisartoq, Javier Solana, aamma Europami nunat sillimanissamut suleqatigiiffianni OSCE-mi pisortaq, Marc Perrin de Brichambaut, Egitsinimi nunanut allanut ministerip siullermik allakkatigut saaffigai.

Naalagaaffiit Peqatigiit ataatsimititaliaat allakkatigut novembarip naajartornerani aamma saaffigineqarput. Allakkat taakku Naalagaaffiit Peqatigiit pisortaannut Kofi Annanimut siusinnerulaartukkut nassiunneqarput.

Aviisi Politiken naapertorlugu, nunat Naalagaaffiit Peqatigiinnut ilaasortat tamarmik Egitsinimi nunanut allanut ministerimit allaffigineqarput, ilaatigut ima oqaasertalimmik:

- Nunap suulluunniit aviisimik pillaasoqarnissaanik kissaateqarsinnaanera ilimaginngilarput. Taamaakkaluartoq ilimagisimagaluarparput upperisarput tunngavigalugu danskinit ataqqineqarnerunissarput.

Ministeriuneq Anders Fogh Rasmussen siusinnerusukkut oqarpoq, muuamaamik upperisallit aallartitaannik ataatsimeeqateqarusunnani, aviisip Jylland-Postenip sakkortuumik tikkuaavigineqarnissaa taakku kaammattuutigereermassuk.