Egyptenimi ullut pingajussaannik perulluliortoqarpoq
Pisunik takunnittut tusagassiuuteqarfimmut Reutersimut taamatut oqaluttuarput.
Aqqusinerni aporaattoqarnerani inuit 1000-it sinneqartut paarnaarunneqareerput arfinillillu toqutaallutik.
Egyptenimi politikerinut illuatungiliuttoq Mohamed El-Baradei unnugu Kairomut angerlarniarmat, taassuma illuatungiliuttut kattutsissinnaassagai akerliussutsimik takutitsisunit neriuutigineqarpoq.
Mohamed El-Baradei sakkut atomitallit pillugit qasusuilluni isumaqatigiinniartartutut tusaamasaraarput.
Uani tusarparput Iranip atomitalinik sakkuliorniarnera pillugu saqqummiisoq. El-Baradei Naalagaaffiit Peqatigiit atomimik nukissiorfeqarneq pillugu immikkoortortaani ukiuni aqqaneq marlunni siuttuusinnarluni siorna aatsaat tunuarpoq. Immikkoortortaqarfik siuttuuffigisani peqatigalugu 2005-imi Nobelip eqqissineqarnissaanut suliaqartunut nersornaasiuttagaanik nersornaaserneqarpoq, ilaatigut atomi atorlugu nukissiarineqartup sakkunut atorneqarnissaa pinaveersaartillugu suliaqarnini pissutigalugu.
El-Baradei 68-nik ukiulik Egyptenimiut pisuut kinguaaraat, ataatalu pissaaneqartunut isorinnittuusimavoq demokratiilu naapertorlugu naalakkersuisoqarnissaa tapersersortuusimallugu. El-Baradei siorna Egyptenimi politikeritut sassaqqaarami aamma inuit oqartussaaqataanissaat tapersersorpaa. Ukiaq inatsisartunut qinersisoqarnissaanut qineqqusaarnissartik siunniullugu suleqatigiissitalioraluarpoq, qinersinissalli præsidentimit Hosni Mubarakimit nakkutigineqarluni aqunneqarnera akerleralugu qineqqusaarniaratilluunniit nalunaaginnarput.
Nunat killiit ingerlaasaannik tapersersuisoq El-Baradei maannakkut Østrigemi najugaqarpoq, ullunilu kingullerni ingammik USA isornartorsioqattaarlugu. Soorlu USA-p nunanut allanut ministeriata Hillary Clintonip Egyptenimi inuiaqatigiit aalajaatsumik ingerlanneqarnerat nersualaarmagu.
- Isumaqarsimagaluarpunga Hillary Clintonip Egyptenimi pissutsit pillugit oqalugiarnermini inuit kiffaanngissuseqarnissaat, demokratii inuillu pisinnaatitaaffii pillugit saqqummiussissasoq, Mohamed El-Baradei.