Egyptenimi innuttaasut upperinninngitsorpassuupput
Illoqarfiup qeqqa sakkutuunit ilumut nakkutigineqalersoq sivikitsukullammik isumaqartoqaraluarpoq, illoqarfiummi qeqqa tamanna akerliussutsimik takutitsiffioqaaq, præsident Mubarakip uppitinneqarneranik naggataagut kingunilimmik.
Nakkutigineqarlualerneranilli isumaqarneq sivikitsuinnaavoq, kinguninnguami politiit 100-t arlallit isaapput, akerliussutsimik takutitsisut taperserniarlugit - taamaalisoqarmallu sakkutuut akuliutinngilluinnarput.
Igitsinimi sakkutuut naalagaat Igitsinimiullu qaraasiaq atorlugu akerliussutsimik takutitsisartut ullumi siusinnerusukkut ataatsimeeqatigiipput, taakku tassaapput akerliussutsimik takutitsisoqarnerani nukimmik atuinerpaat.
- Isumaat paasiniarlugit sakkutuunik naapeqateqarpugut, uagut isummavut aamma paasitinniarlugit, nittartakkami Google-imi akisussaasoq, Wael Ghonim, inuinnaat naalakkersueqataanerannut tapersersuisut nittartagaanni allappoq.
Nunami naalakkersuinikkut aaqqissuussinerup atorunnaarsinneqarnissaanik neriorsuutertik ataatsimiinnermi sakkutuut aammaarlutik oqaatigeqqippaat, naalakkersuinikkut aaqqissuussineq nutaaq ullut qulit qaangiuppata taamaalilluni atuutilersinneqarniassammat, inunnillu qaammatit marluk ingerlaneranni taasisitsisoqarniassammat. Pilersaarut tamanna akerliussutsimik takutitsisut piumasaqaataannut naapertuulluinnarpoq.
