Egyptenimi Facebook, SMS-ersinnaanerlu oqartussat matuaat
Danmarkip Radioata Kangiani Qitermi aallartitaa, Steen Nørskov maanna Kairo-miittoq oqaluttuarpoq, Twitterip matuneqannginneran taanna atorneqarluarsimaqisoq.
Twitteri matuneqanngitsiartoq Steen Nørskovip alakkaramiut takuai, assit Kairo-mi muamaat kristumiullu oqaluffii assilineqarsimasut arlippassuit. Aamalu atuarsinnaasimavaa, ualimut akerliussutsimik takutitsisoqarnissaani, illoqarfimmi Alexandriami pisussami, pilersaarut kaammattuullu.
Akerliussutsimik takutitsineq qinoqatigeereernerup kingorna pilersaarutaavoq.
Taama pilersaartoqarnera pissutigalugu maanna oqartussat Kairop aqqusernini sakkutuuliipput, taamaaliortoqarnera ernumanartoq, Steen Nørskovip oqaatigaa:
- Aqqusinerni sakkutuuliinerup takutippaa, akerliussutsimik takutitsiniat aamma oqartussat naatsorsuutigigaat ulloq pisoqarfiussagunartoq, immaqalu aattaqassagunartoq. Sakkutuut, pinerliinianut akersuuttartut, aqqusinerni nakkutiginnittussatut toqqaraanni, taamaaliorneq ima paasineqarsinnaasoraara, oqartussat uivilersimasut aammalu qanoq pisut aallaavigalugit qanoq iliussallutik nalornilersimasut, Steen Nørskov oqarpoq.
Danskit Egyptenimiullu Dialoginstitut-ianni pisortaq, Rasmus Boserup Kairomiit uteqqammersoq oqarpoq, internettikkut attaveqaatit aammalu oqarasuaatit ilaat, oqartussanik matuneqarneri siornatigut takusimanngisaannarlugu.
Rasmus Boserupip ilanngullugu oqaatigaa, akerliussutsimik takutitseqattaarnerit, præsident Mubarakip naalakkersuinera ulorianartorsiortikkaa, tassami taannarpiaq pillugu akerliussutsimik takutitsinerit aallartimmata. Akerliussutsimik takutitsisarneq Egyptenimi takornartaavoq.
