Egyptenimi amilaartartumik qaartartumeerinerit
Ippassaq ualisoq Egyptenimi illoqarfimmi Dahabimi inuit 23t inuunerinik akeqartumik pingasunik qaartartumeerisoqarnerata kingorna tamat tupassimarrapput. Akabap kangerliumarngata sineriaani takorniariat ornigarluartagaanni pingajussaa qaartartumeerisoqarpoq.
Dahabimi pingasunik qaartartumeerinerni toqusut 23t, ikiligaasullu 64it amerlanersaat takornariaapput – nunanit assigiinngitsunit aqqaneq marlunneersut. Ikilikkanut ilaapput danskit tallimat.
Dahabimi pisuinnaat aqqutaanni illut, pisiniarfiit allaffiit, napasinnaasut qaartitsinerni aserorluinnarneqarsimapput. Qarmanili avasinnerusuni suli napasuni takussaapput qaartitsinerni tammikaasimasut kappussuussimasut.
Egyptenimi oqartussaasut saligisitsipput, toqungasut timaasa pisataat katersortillugit.
Qaartartumeerinerni akisussaasunik nalunaartoqanngilaq. Qularutissaanngilarli Egyptenip ukiumut 40 mia. kr.nik iluanaarutigiffigisartagaa - takornariaqarneq, innarlerujussuarneqarmat.
Qaartitsinerit Dahabip pisuinnaat aqqutaanni takornariat katersuuteruttortut pisimapput. Naak qaartinneqartut pingasut papæskenut puukkat anginngikkaluit, inoqaleruttornerata nalaani qaartinneqarmata kinguneri amiilaarnarsimaqaat.
