Egon Sikivat toquvoq
Qilaatersortartoq Egon Sikivat 67-inik ukioqarluni Nuummi Dronning Ingridip Napparsimavissuaniitilluni ippassaq ualikkut toquvoq.
Allattoq Louise M. Kleemann
Egon Sikivat Kuummiuneersuuvoq, meeraanerminiillu qilaatersornermik sammisaqarpoq. Nunatsinni Danmarkimilu ilisimalluarneqarluartuuvoq, ilaatigut rockimik nipilersortartut Sume 1976-imi nuussualiamik pingajussaannik saqqummersitsineranni peqataalluni.
Tamatuma kingorna Tunumiut qilaatersuutaannik qiimasumik takutitsisarnerminik tusaamaneqarlualerpoq.
Egon Sikivat Kunngikkormiunut tusarnartitsisarsimavoq nunanullu assigiinngitsorpassuarnut qilaatersoriartarsimalluni.