Efterskolit pillugit inatsit atuutilerpoq
Kalaallit Nunaanni efterskolit allanngortiterneqarnissaannik siunertarineqartoq tassaavoq atuartut ataatsimoortutut misigisimallutik nalinginnaasumik ineriartornissaannut killiliussassat pitsaanerpaat pilersinneqarnissaat. Tamanna demokratiip pilersinneqarnissaanut, inunnut allanut ataqqinnissamut nunarsuarmioqatitsinnullu qanilliartornermi innuttaaqataanermut iluaqutaavoq, tamatumani ilinniartitaanikkut ataatsimoornermi ataatsimoorneq, akisussaassuseqarneq piareersimanerlu piumasaqaatinut ilaallutik.
Siunertarineqartut aammattaaq ilagaat inuusuttunut Kalaallit Nunaanni efterskolimiinnissaminni tapiiffigineqarnissaminnut danskit oqaasiinik naammattumik piginnaasaqanngitsunut ilinniartitaanikkut naleqquttumik neqerooruteqarfiginissaat, aammattaarlu inuusuttut danskit oqaasiinik naammattumik piginnaasaqannginnertik pissutigalugu Danmarkimi efterskolinut isersinnaanngitsut neqeroorfigineqarnissaasa qulakkeerneqarnissaat.
Ilinniartitaaneq naammassissagaanni ilaatigut danskit tuluillu oqaasiinik pisariaqartumik piginnaasaqarnissaq piumasaqaataavoq. Taammaattorli inuusuttut amerlaqisut oqaatsinik piginnaasaqannginnertik pissutigalugu ilinniarnertik naammassineq ajorpaat.
Innuttaasunut kalallisuinnaq oqaluttunut ilinniartitaanikkut neqeoorutit pilersinneqassapput, danskit oqaasii atornerullugit ilinniartitaanikkut neqeroorutinut peqatigitillugit, tamatumani ilaatigut inuusuttunut Danmarkimi efterskoliniikkusuttunut tapersersorteqarnermik aaqqissuussinerup ingerlatiinnarneqarnissaa.
Efterskolit pillugit Inatsisartut inatsisaanni makkua qulakkeerneqarput:
- Kalaallit Nunaanni inuusuttunut 14-it 17-illu akornanni ukiulinnut efterskolimi ilinniarnissamik neqerooruteqarneq.
- Meeqqat atuarfianni inaarutaasumik naliliinerup naammassineqarnissaanik efterskolip neqerooruteqarnera.
- Efterskolit tassaapput sullissiviit nammineq ingerlatittut, naleqartitatut tunngaviit nammineerluni toqqakkat malillugit ilinniartitsinissamik neqerooruteqartartut.
-Efterskolini ilinniartitaanissamik neqeroorutit tamatigoortut.
